Deputetët e legjislaturës së nëntë do të mblidhen sot në përpjekjen e 18-të për konstituimin e Kuvendit. Seanca e re, e cila pritet të nisë në orën 10:30, është një mundësi tjetër për të kaluar pengesat që kanë bllokuar formimin e institucioneve.
Të shtunën, përpjekja e 17-të dështoi, pasi në seancën e 17 majit, formimi i Komisionit për votim të fshehtë – një hap kyç për zgjedhjen e kryetarit të Kuvendit – mori vetëm 53 vota për dhe një kundër, duke mos arritur shumicën e nevojshme për të avancuar procesin.
Lëvizja Vetëvendosje vazhdon të insistojë për zgjedhjen e Albulena Haxhiut në postin e kryetares së Kuvendit, ndërsa partitë që në legjislaturën e kaluar ishin në opozitë duket se mbajnë qëndrimet e tyre të pandryshuara.
Tani mbetet të shihet nëse deputetët do të arrijnë një konsensus në përpjekjen e 18-të, ose do të përballen me pengesa të tjera në këtë proces të vonuar të konstituimit të Kuvendit.
