Një incident i rëndë me armë zjarri ka ndodhur ditën e djeshme në qytetin e Pejës, ku sipas autoriteteve, është raportuar për një rast të tentim-vrasjes.
I dyshuari kryesor në këtë ngjarje është Miftar Dobraj, i cili aktualisht ndodhet në arrati. Sipas burimeve zyrtare, ai dyshohet se ka shtënë në drejtim të Dardan Manajt, i njohur ndryshe me nofkën “Manilla”.
Zëdhënësi i Prokurorisë Themelore në Pejë, Shkodran Nikçi, konfirmoi se institucionet e drejtësisë janë duke zhvilluar hetime intensive dhe janë në ndjekje të të dyshuarit. “Po punohet me intensitet për lokalizimin dhe arrestimin e tij”, u shpreh Nikçi.
Sipas informacioneve paraprake, motivi i ngjarjes dyshohet të jetë një mosmarrëveshje e mëhershme mes palëve.
- Advertisement -
Policia ka rrethuar zonën ku ndodhi incidenti dhe po mbledh prova për të sqaruar rrethanat e plota të rastit. Autoritetet u kanë bërë thirrje qytetarëve që posedojnë informacione të dobishme të bashkëpunojnë për identifikimin dhe kapjen e të dyshuarit.
Hetimet për këtë rast janë në vazhdim.
