Kryeministri në detyrë, Albin Kurti, ka kryer regjistrimin e tij si deputet në Kuvendin e Kosovës, si pjesë e procesit të regjistrimit të deputetëve të Lëvizjes Vetëvendosje (VV), të cilët kanë siguruar mandatet pas zgjedhjeve të 9 shkurtit.
Pasi përfundoi regjistrimin, Kurti nuk ka bërë asnjë koment për mediat, duke shmangur pyetjet lidhur me formimin e Qeverisë.
Sot, do të vazhdojë regjistrimi i deputetëve të Lëvizjes Vetëvendosje, e cila doli e para në zgjedhjet parlamentare të 9 shkurtit. Ky proces është formal dhe i domosdoshëm për të mundësuar zhvillimin e seancës konstituive të Kuvendit, e cila është planifikuar të mbahet më 15 prill 2025. Gjatë kësaj seance pritet të zgjidhet kryetari i Kuvendit dhe të krijohen strukturat e para parlamentare.
Regjistrimi i deputetëve do të vazhdojë në ditët në vijim, duke i dhënë mundësinë të gjithë anëtarëve të rinj të përfundojnë procedurat zyrtare para nisjes së punës legjislative.
