Presidentja e Kosovës, Vjosa Osmani, ka theksuar angazhimin e Kosovës për të thelluar dhe forcuar aleancën me Shtetet e Bashkuara të Amerikës gjatë administratës së ish-Presidentit Donald Trump. Në një intervistë të dhënë për influencerin australian, Mario Nawfal, Osmani ka vlerësuar mbështetjen e paçmueshme amerikane gjatë periudhave më të vështira të historisë së Kosovës, duke e cilësuar atë si vendimtare për lirinë dhe pavarësinë e vendit.
“Që nga nata më e errët e luftës, e deri te mëngjesi i lirisë – Amerika ishte aty për ne”, theksoi presidentja, duke shtuar se synimi është forcimi i mëtejshëm i këtij aleancimi të rëndësishëm.
Osmani gjithashtu ka folur për shpërbërjen e Jugosllavisë dhe rolin shkatërrues të Sllobodan Millosheviqit në këtë proces, duke theksuar se ai nisi luftën kundër çdo kombi që nuk mendonte si ai, përfshirë Slloveninë, Kroacinë, Bosnje e Hercegovinën dhe më pas edhe Kosovën.
Lufta e Millosheviqit, sipas Osmanit, nuk ishte vetëm për territor, por edhe kundër civilëve, grave dhe fëmijëve. Ajo ka theksuar se regjimi i tij synonte shkaktimin e një dëmi të paimagjinueshëm ndër gjenerata në Kosovë, duke dashur të “zhdukë shqiptarët e Kosovës nga faqja e dheut”. Sipas saj, këto krime u ndaluan falë ndërhyrjes së demokracive botërore, me Shtetet e Bashkuara të Amerikës në krye.
- Advertisement -
Presidentja Osmani ka vënë në dukje se, pas shpëtimit nga shkatërrimi, Kosova është bërë një nga vendet më pro-amerikane në botë. Ajo ka theksuar se ky aleancë është jetike për të ardhmen e Kosovës, duke shprehur mirënjohjen e thellë për mbështetjen e vazhdueshme nga SHBA.
“Millosheviqi deshi t’na fshijë nga faqja e dheut. Dhe mrekullisht, demokracitë nga e gjithë bota, të udhëhequra nga SHBA, shpëtuan jetët tona”, shtoi Osmani.
Në përmbyllje, Presidentja Osmani ka theksuar se Kosova do të mbetet e pathyeshme dhe e palëkundur në rrugën e saj, duke siguruar se aleanca me Shtetet e Bashkuara të Amerikës është e përjetshme dhe thelbësore për stabilitetin dhe zhvillimin e vendit.
“Kosova do të qëndrojë e përjetshme, ashtu si edhe aleanca jonë me Shtetet e Bashkuara të Amerikës”, përfundoi ajo.
