Inspektorët komunalë të Mitrovicës së Veriut, të asistuar nga Policia e Kosovës, kanë ndërmarrë sot një aksion për rikthimin në pronësi të komunës të një ndërtese që deri më tani ishte shfrytëzuar nga strukturat paralele të mbështetura nga Serbia.
Objekti në fjalë, i cili ka funksionuar si i ashtuquajturi “Shërbimi Kombëtar i Punësimit”, operonte me mbështetje nga Beogradi zyrtar, përkundër moslegjitimitetit të tij brenda sistemit institucional të Republikës së Kosovës.
Zëvendësdrejtori i Policisë për rajonin e veriut, Veton Elshani, konfirmoi për media se gjatë ndërhyrjes janë gjetur prova që dyshohet se lidhen me vepra penale.
“Sot kemi asistuar inspektorët komunalë në hyrjen e një objekti që ata e konsiderojnë pronë të komunës. Gjatë kontrollit brenda, janë gjetur materiale që konsiderojmë se janë të kundërligjshme dhe përbëjnë vepër penale”, deklaroi Elshani.
- Advertisement -
Ai bëri të ditur se pas konsultimeve me prokurorin kujdestar, objekti është mbyllur dhe pritet që provat të dorëzohen për ekzaminim të mëtejshëm nga organet e drejtësisë.
“Nuk ka persona të arrestuar në këtë fazë. Prokuroria do të vendosë për hapat e radhës”, shtoi Elshani.
Ky veprim vjen në kuadër të përpjekjeve të institucioneve të Kosovës për të shuar strukturat paralele dhe për të rikthyer kontrollin e plotë institucional në veri të vendit.
