Policia e Kosovës ka konfirmuar shpërthimin e një granate dore brenda objektit të Postës së Kosovës në Zveçan, ndërsa shton se një tjetër granatë është shpërthyer në mënyrë të kontrolluar nga autoritetet.
Zëvendësdrejtori i Policisë së Kosovës për veriun, Veton Elshani, tha për Radion Evropa e Lirë (REL) se nuk ka pasur persona të lënduar, por janë shkaktuar dëme materiale.
Dega e Postës së Kosovës në Zveçan u hap më 27 mars, të njëjtën ditë kur u hap edhe dega në Zubin Potok, dy komuna të banuara me shumicë serbe në veri të Kosovës.
Në fund të vitit të kaluar, u raportuan disa sulme të ngjashme me granata dore. Më 27 nëntor, stacioni policor në Zveçan u sulmua me dy granata dore, duke shkaktuar dëme materiale, por pa të lënduar. Po ashtu, më 29 nëntor, Policia njoftoi se ndërtesa e Komunës së Zveçanit ishte sulmuar me një mjet shpërthyes, dyshohet granatë dore.
- Advertisement -
Në vitet e fundit, janë regjistruar disa sulme të tilla në veri të Kosovës, sidomos gjatë periudhës kur ka nisur zbatimi i vendimit të Qeverisë së Kosovës për konvertimin e targave serbe në ato të Kosovës (RKS). Tensionet në veri janë përshkallëzuar, edhe për shkak të veprimeve që autoritetet e Kosovës i konsiderojnë si hapa për forcimin e sovranitetit të Kosovës në këtë pjesë.
Në katër komunat me shumicë serbe në veri të Kosovës, janë mbyllur shumë institucione paralele serbe, përfshirë zyra postare dhe tatimore, që nga fillimi i vitit të kaluar. Po ashtu, më 15 janar, u mbyllën edhe institucione serbe në dhjetë komuna në jug të Kosovës, pasi autoritetet në Prishtinë i quajtën ato të paligjshme.
Mbyllja e institucioneve paralele të Serbisë ka shkaktuar kundërshti, pasi Prokuroria Themelore në Prishtinë nuk kishte dhënë autorizimin për këtë operacion, duke e konsideruar të paakorduar.
Përveç ndërmarrjeve publike dhe organeve komunale, janë mbyllur edhe disa institucione të tjera, përfshirë Postën e Serbisë, Bankën Postare Kursimorë dhe Drejtorinë e Fondit për Sigurimin Pensional dhe Invalidor, ndërsa institucionet arsimore dhe shëndetësore vazhdojnë të punojnë në sistemin serb.
Serbët në veri të Kosovës gëzojnë mbështetje të konsiderueshme nga Beogradi, i cili ka financuar strukturat paralele dhe ka mbështetur qytetarët serbë përmes pensioneve dhe shtesave të tjera.
- Advertisement -
Shtetet e Bashkuara të Amerikës dhe Bashkimi Evropian kanë kritikuar disa nga veprimet e Prishtinës në veri, duke i konsideruar si të paakorduara. Blloku evropian ka apeluar që Kosova dhe Serbia të normalizojnë raportet përmes dialogut të Brukselit, duke e bërë këtë proces një kusht për integrimin evropian. /REL/
