Kryeministri në detyrë i Republikës së Kosovës, Albin Kurti, qëndroi sot në Poznan të Polonisë, ku mori pjesë në konferencën ndërkombëtare IMPACT 2025, në edicionin e saj të 10-të.
Në prag të konferencës, mbrëmjen e kaluar, Kurti mori pjesë në një darkë zyrtare të shtruar nga ministri i Jashtëm i Polonisë, Radosław Sikorski, dhe drejtori i konferencës, Sławomir Sierakowski. Gjatë këtij takimi, ai pati rastin të bisedojë me ish-Sekretarin amerikan të Shtetit, John Kerry, publicisten Anne Applebaum dhe ministrin Sikorski.
Gjatë darkës, kryeministri Kurti zhvilloi një bisedë edhe me nobelisten polake Olga Tokarczuk, me të cilën diskutoi për letërsinë, kulturën dhe politikën. Ai e informoi shkrimtaren për përkthimin në gjuhën shqipe të disa prej veprave të saj.
Në mesin e figurave të tjera me të cilët u takua, ishin historiani i njohur Timothy Snyder dhe mendimtari polak, si dhe ish-i burgosuri politik, Adam Michnik, me të cilin Kurti ishte takuar më parë në vizitën në redaksinë e Gazeta Wyborcza në tetor 2024.
- Advertisement -
Sot në mëngjes, Kurti mori pjesë në hapjen zyrtare të konferencës, e cila u përshëndet nga ministri Sikorski. Në kuadër të programit, ai dha edhe një intervistë për televizionin publik polak në gjuhën angleze, TVP World.
Gjatë qëndrimit në Poznan, Kurti zhvilloi takim edhe me ish-konsullin e nderit të Shqipërisë në këtë qytet, Jarosław Rosochacki – historian, etnolog dhe albanolog, i cili ka ndjekur çështjen shqiptare që nga vitet ’70. Kryeministri e falënderoi Rosochackin për kontributin e tij të gjatë dhe të çmuar në promovimin e Kosovës dhe çështjes shqiptare në Poloni.
