Mbyllen shumë lokale ‘muzikë live’ dhe qendra masazhi, 14 të arrestuar

Policia e Kosovës ka qenë pjesë e veprimeve të përbashkëta me EUROPOL-in, INTERPOL-in dhe FRONTEX-in, në parandalim dhe luftim të trafikimit me njerëz.

Drejtoria për Hetimin e Trafikimit me Njerëz e PK-së, ka qenë pjesë e zbatimit të operacionit ‘OPERATION CHAIN’, të zhvilluar njëkohësisht në 47 shtete të botës.

Sipas njoftimit, Policia e Kosovës nga data 8 maj deri më 14 maj 2023,  ka zbatuar Planin Operativ ‘Stuhia 2023’, me shtrirje në të gjithë vendin,  në bashkëpunim me inspektoret e tregut nga MINT, Administratën Tatimore dhe inspektoret e punës.

Në operacion janë përfshirë 262 zyrtarë nga PK-ja dhe institucionet e lartcekura.

Pjesë e operacionit kanë qenë: Operacione në rrugë, sheshe dhe qendra tregtare për identifikimin e fëmijëve në situatë rruge; inspektimin/kontrollimin e lokaleve ‘Muzikë Live’ , inspektimin/kontrollimin e ‘Qendrave të Masazhit’, kontroll të shtuara në të gjitha pikë-kalimet kufitare.

Në njoftimin e Policisë thuhet se nga veprimet e ndërmarra janë identifikuar 3 viktima të trafikimit dhe 11 viktima të supozuara të trafikimit, të cilat janë referuar për shërbime dhe trajtim sipas procedurave.

Janë arrestuar 14 persona të dyshuar për veprën e trafikimit dhe veprave të tjera që ndërlidhen me trafikimin me njerëz. 6 raste janë referuar në stacione policore për armëmbajtje pa leje, dëmtim të vulave zyrtare dhe hapje ilegale të lokaleve të mbyllura.

Ndërsa nga inspektimi/kontrollimi i 55 lokaleve ‘Muzike Live’, janë legjitimuar 377 punëtorë, nga të cilët 275 të gjinisë femërore, 188 shtetas të huaj. Nga lokalet e kontrolluara, 15 janë mbyllur nga institucioni përkatës për shkelje administrative.

Policia gjithashtu ka inspektuar 51 ‘Qendrave të Masazhit’,  në të cilat janë legjitimuar gjithsej 153 punëtorë, nga të cilët 129 të gjinisë femërore dhe 33 shtetas të huaj. Prej këtyre ‘Qendrave Masazhi’, 17  janë mbyllur nga institucioni përkatës për shkelje administrative.

“Policia do të vazhdojë edhe në të ardhmen të jetë pjesë e bashkëpunimit dhe iniciativave/operacioneve ndërkombëtare si dhe operacioneve të organizuara në nivel vendi,pasi lufta kundër trafikimit me njerëz është sfidë ndërkombëtare e vendore e cila duhet të luftohet në bashkëpunim e koordinim ndërkombëtar e me institucione vendore e qytetarë”, thuhet në njoftim.