Komandanti i Forcës së Sigurisë së Kosovës, Gjenerallejtënant Bashkim Jashari, po zhvillon një vizitë zyrtare në Republikën e Shqipërisë, me ftesë të homologut të tij, Gjenerallejtënant Arben Kingji, Shef i Shtabit të Përgjithshëm të Forcave të Armatosura të Shqipërisë.
Vizita filloi me një pritje zyrtare dhe nderime të larta ushtarake për Gjeneral Jasharin, e më pas u zhvillua një takim mes dy delegacioneve, ku u diskutua për zhvillimet e fundit në fushën e sigurisë dhe forcimin e bashkëpunimit ushtarak. Gjenerallejtënant Kingji informoi homologun e tij për arritjet dhe përparimet e Forcave të Armatosura të Shqipërisë (FARSH) nën udhëheqjen e tij, ndërsa Gjenerallejtënant Jashari e përgëzoi për këto suksese dhe vlerësoi rëndësinë e kontribuimit të FARSH për sigurinë rajonale.
Dy komandantët theksuan mundësitë për zgjerimin e bashkëpunimit të mëtejshëm në fushën ushtarake, duke i dhënë një rëndësi të veçantë aktiviteteve të përbashkëta dhe forcimit të ndërveprueshmërisë mes forcave të armatosura të dy vendeve.
Në kuadër të vizitës, Gjeneral Jashari pati një takim edhe me Ministrin e Mbrojtjes të Shqipërisë, Pirro Vengu. Ministri Vengu e njoftoi homologun kosovar për sfidat dhe sukseset e Ministrisë së Mbrojtjes dhe FARSH, si dhe për angazhimin e Shqipërisë në kuadër të NATO-s. Gjenerallejtënant Jashari vlerësoi lartë mbështetjen që Shqipëria ka ofruar për zhvillimin e kapaciteteve të FSK-së, përmes trajnimeve dhe bashkëpunimit të vazhdueshëm.
- Advertisement -
Delegacioni i Forcës së Sigurisë së Kosovës vizitoi gjithashtu Bazën Ajrore të Kuçovës, ku u njohën me investimet dhe procesin e modernizimit të kësaj baze strategjike.
“Kjo vizitë është dëshmi e përkushtimit të dy vendeve për forcimin e kapaciteteve të përbashkëta dhe bashkëpunimit të ngushtë në fushën e sigurisë dhe mbrojtjes”, thuhet në njoftimin e FSK-së.
