Ministri i Mbrojtjes së Kosovës, Ejup Maqedonci, ka dhënë detaje rreth marrëveshjes së nënshkruar me Turqinë.
Në një intervistë për Euronews Albania, ai tha se fokusi i marrëveshjes ka qenë fabrika e municionit, dhe sipas tij kjo do të bëhet me financim nga Qeveria e Kosovës, ndërsa pajisjet do të sigurohen nga shteti turk.
“Ne kemi nënshkruar kontratën dhe pas nënshkrimit fillon edhe puna për funksionalizimin e kësaj fabrike. Do të jetë një ndërmarrje publike që do të menaxhojë komplet fabrikën dhe qëllim kryesor do të ketë prodhimin e municione 5.56 dhe 7.62, municione këto që përdoren nga njësitë e hetuesisë dhe njësitë ushtarake dhe që janë municionet që më së shumti shpenzohen edhe gjatë operacioneve por edhe gjatë trajnimeve”, tha Maqedonci.
Ai theksoi se prodhimi nuk do të bëhet vetëm për furnizimin e institucioneve vendore por edhe për eksport.
