Emisari i Bashkimit Evropian për dialogun Kosovë-Serbi, Miroslav Lajçak, pas takimit me zëvendëskryeministrin, Besnik Bislimi në një konferencë për media tha se duan më shumë përparim në zbatimin e Marrëveshjes Bazike, e cila siç tha ai tashmë ka bërë 1 vit që nga nënshkrimi.
“Kemi diskutuar një listë të gjatë të çështjeve. Dhe më e rëndësishmja është zbatimi i Marrëveshjes Bazike të arritur dhe kjo është në interes të të gjithëve që të kemi progres në zbatimin e kësaj marrëveshjeje. Kjo marrëveshja më e mirë që kemi mundur të arrinim. Nëse do të kishte marrëveshje më të mirë, do ta kishim bërë prandaj është në interes të secilit të zbatohet, sepse në këtë marrëveshje kemi të gjitha përgjigjet, çfarë të bëjmë dhe si t’i bëjmë. Pyetja e vetme është se kur do të ndodhë zbatimi i këtyre pikave. Kemi shpenzuar shumë kohë për të ndërmarrë hapa dhe ka frikë në të dyja palët se çfarë do të bëjë unë e çfarë pala tjetër. Por besoj se këto çështje munden shumë thjesht të zgjidhen”, tha Lajçak.
Ai tutje tha se në takimin me zëvendëskryeministrin Besnik Bislimi kanë folur mes tjerash edhe për rregulloren e BQK-së.
“Diskutuam edhe për çështjen e pagesave dhe që është pjesë relevante e dialogut. Janë disa përgjigje që duhet analizuar, por ky është një proces. Duhet të jemi të sigurt që qytetarët të mos të ndikohen negativisht nga rregullorja e re e BQK-së”, tha Lajçak.
- Advertisement -
Tutje ka bërë të ditur Lajçak se është duke planifikuar që në ditët në vijim të mbajë takim të ri në Bruksel.
