Deputetët e Kuvendit të Republikës së Kosovës do të mblidhen sot në ora 10:00 për të vijuar punimet e seancës konstituive të Legjislaturës së nëntë. Në rendin e ditës është paraparë zgjedhja e kryetarit dhe nënkryetarëve të Kuvendit, proces që deri më tani ka hasur në pengesa.
Në seancën e kaluar, nuk u arrit të zgjidhet kryetari i Kuvendit, pasi kandidatura e propozuar nga Lëvizja Vetëvendosje, deputetja Albulena Haxhiu, nuk mori mbështetjen e nevojshme. Me 57 vota për, 46 kundër dhe tri abstenime, propozimi nuk kaloi, çka bëri që kryesuesi Avni Dehari të ndërpresë seancën.
RTK ka paralajmëruar një emision special që do të nisë nga ora 09:30, i cili do t’i kushtohet zhvillimeve më të fundit politike në vend dhe procesit të zgjedhjes së kryesisë së Kuvendit.
