Deputetët e Kuvendit të Kosovës pritet të mblidhen sërish sot, më 23 maj, në përpjekje për ta konstituar legjislaturën e re – për të njëzetën herë me radhë.
Seanca është thirrur për në orën 11:00, pas një sërë tentativash të pasuksesshme që nuk kanë arritur të prodhojnë ndonjë vendim përfundimtar. Pavarësisht përpjekjeve të vazhdueshme, Kuvendi mbetet i pakonstituar, duke e thelluar krizën politike dhe institucionale në vend.
Tentativa e fundit, e mbajtur të mërkurën, dështoi sërish pasi komisioni përgjegjës për organizimin e votimit të fshehtë për zgjedhjen e kryetarit të Kuvendit nuk arriti të sigurojë përkrahjen e nevojshme. Me vetëm 54 vota për, një kundër dhe asnjë abstenim, propozimi nuk kaloi.
Kryesuesi i seancës, deputeti më i vjetër Avni Dehari, ka konfirmuar se mbledhja e radhës do të mbahet sot. Megjithatë, mbetet e paqartë nëse edhe kjo përpjekje do të çojë drejt një zgjidhjeje apo do të jetë vetëm një tjetër episod në krizën e tejzgjatur parlamentare.
