Përpjekja për konstituimin e Kuvendit të Kosovës ka dështuar për herë të 29-të me radhë, duke thelluar më tej krizën institucionale që ka përfshirë vendin pas zgjedhjeve.
As seanca e sotme nuk solli ndonjë përparim, pasi deputetët nuk arritën të bien dakord për formimin e Komisionit të përkohshëm, i cili do të mbikëqyrte procesin e votimit të fshehtë për zgjedhjen e kryetarit të Kuvendit.
Edhe këtë herë, partitë opozitare PDK, LDK, AAK-NISMA si dhe Lista Serbe refuzuan të propozojnë anëtarët e tyre për përbërjen e komisionit, duke e lënë procesin pa kuorum të plotë.
Në sallë ishin të pranishëm 102 deputetë, por vetëm 53 prej tyre votuan në favor të formimit të komisionit. Nuk u regjistrua asnjë votë kundër apo abstenim. Për pasojë, seanca u ndërpre nga kryesuesi Avni Dehari, i cili njoftoi se ajo do të vazhdojë më 11 qershor, në orën 11:00.
- Advertisement -
Ndërkohë, përfaqësues të pozitës dhe opozitës së mëparshme vazhduan shkëmbimin e akuzave për bllokimin e procesit dhe mungesën e vullnetit politik për të arritur një marrëveshje që do t’i hapte rrugë formimit të institucioneve.
