Kryeministri i Kosovës edhe njëherë ka folur për marrëdhëniet midis Kosovës dhe Shteteve të Bashkuara të Amerikës.
Kurti është shprehur se Shtetet e Bashkuara të Amerikës nuk mund ta përfaqësojnë Kosovën e as Kurti vet nuk mund ta përfaqësojë SHBA-në.
“Unë nuk e ndjej këtë, përkundrazi, unë kam takime të rregullta me ambasadorin amerikan për çdo javë dhe jemi vazhdimisht në kontakt e në komunikim dhe pothuajse gjithmonë pajtohemi, por jo gjithmonë, sepse unë nuk mund t’i përfaqësoj Shtetet e Bashkuara të Amerikës, ambasadori amerikan dhe as sekretari i shtetit apo departamenti i shtetit nuk mund ta përfaqësojnë Kosovën. Ne udhëhiqemi nga idealet amerikane, mirëpo kjo është Kosovë dhe ne duhet ta mbrojmë shtetin tonë, popullin tonë, historinë tonë edhe më shumë sesa që e bën këtë kushdo tjetër. Pra, ne nuk mund të presim që Shtetet e Bashkuara të Amerikës do ta mbrojnë Kosovën në diskurs edhe më shumë sesa vet ne, përkundrazi ne duhet që për Kosovën të kërkojmë edhe më shumë sesa kushdo tjetër, edhe më shumë se Shtetet e Bashkuara të Amerikës”, ka thënë Kurti.
Ndërsa për konfliktin e mundshëm me Serbinë, Kurti është shprehur se ai është i brengosur, i kujdesshëm, i shqetësuar por asnjëherë i frikësuar, raporton Zëri i Amerikës.
