Kryeministri Albin Kurti ka dënuar sulmin terrorist ndaj objektit të Postës së Kosovës në Zveçan, duke theksuar se liria e figurave si Milan Radoiçiq po shfrytëzohet për qëllime shoviniste.
“Qëndrimi i kriminelit Radoiçiq në liri dhe mosdorëzimi i tij autoriteteve të Kosovës është një mesazh i rrezikshëm që inkurajon kriminelë, terroristë dhe ekstremistë të ndryshëm të vazhdojnë veprimet e tyre me qëllim destabilizimin”, ka shkruar ai.
Kurti e ka quajtur këtë akt si një kërcënim për sigurinë dhe si pengesë për integritetin e qytetarëve brenda sistemit ligjor dhe institucional të Kosovës.
“Sulmi i fshehur me granatë në natën e errët është një përpjekje nga ata që nuk kanë më kontroll në veriun e Kosovës. Posta e Kosovës do të vazhdojë të ekzistojë si ndërmarrje publike, xhami i ri do të vendoset dhe shërbimet ligjore do të vazhdojnë të ofrohen për të gjithë qytetarët. Institucionet përkatëse po kryejnë hetime të plota për të sjellë autorët para drejtësisë. Kosova do të mbetet e përkushtuar për paqe dhe stabilitet rajonal, por nuk do të lejojë asnjë përpjekje për të sfiduar rendin kushtetues dhe sigurinë e qytetarëve të saj”, ka shtuar ai.
- Advertisement -
Në vazhdim, ai ka theksuar se duke krijuar tensione artificiale, po synohet të pengohet funksionimi i institucioneve dhe të minohet zhvillimi ekonomik dhe përparimi demokratik i Kosovës.
Nga shpërthimi që ndodhi pas mesnate në zyrat e reja të Postës së Kosovës në Zveçan, nuk ka pasur të lënduar. “Janë shkaktuar dëme materiale dhe thyerje xhamash, por nuk ka pasur të lënduar,” ka konfirmuar Zëvendësdrejtori i Policisë për Rajonin e Mitrovicës, Veton Elshani.
