Kryeministri në detyrë i Kosovës, Albin Kurti, ka pritur në takim shefen e Misionit të Bashkimit Evropian për Vëzhgimin e Zgjedhjeve Parlamentare në Kosovë 2025, Nathalie Loiseau, e cila i dorëzoi atij raportin përfundimtar të misionit për zgjedhjet e mbajtura më 9 shkurt.
Sipas njoftimit nga Zyra e Kryeministrit, Kurti ka falënderuar Misionin e BE-së për angazhimin dhe kontributin në mbikëqyrjen e procesit zgjedhor, duke vlerësuar rëndësinë e rekomandimeve që përmban raporti për përmirësimin e mëtejshëm të standardeve demokratike në vend.
Gjatë takimit, Kurti ka ngritur disa çështje me rëndësi që lidhen me procesin zgjedhor, si mungesa e verifikimit të premtimeve elektorale nga gazetarë hulumtues profesionistë, transparenca e financimit të fushatave zgjedhore, dhe stërzgjatja e procesit të numërimit të votave.
Një vëmendje të veçantë i është kushtuar konstatimit të Misionit për ndërhyrje të jashtme në zgjedhje, përfshirë përhapjen e dezinformatave nga media ruse me bazë në Serbi, si “RT Balkans” dhe “Sputnik Srbija”, të cilat, sipas raportit, kanë shpërndarë mbi 60 artikuj me qëllim ndikimin në opinionin e komunitetit serb në Kosovë. Kurti i cilësoi këto përpjekje si kërcënim serioz për integritetin e zgjedhjeve dhe stabilitetin demokratik të vendit.
- Advertisement -
Në takim u vlerësua lartë sjellja e qytetarëve gjatë zgjedhjeve, duke theksuar një proces të qetë dhe demokratik pa incidente të theksuara.
Kryeministri Kurti ritheksoi angazhimin e Qeverisë për të adresuar të gjitha rekomandimet e raportit dhe për të punuar në forcimin e institucioneve zgjedhore në të ardhmen.
