Kryeministri në detyrë i Kosovës, Albin Kurti, ka folur për rëndësinë e ushtrimit ushtarak “Defender Europe 2025”, të cilin e cilëson si stërvitjen më të madhe të Ushtrisë së SHBA-së në Evropë. Ai ka bërë me dije se në kuadër të këtij ushtrimi, Forca e Sigurisë së Kosovës (FSK) do të zhvillojë operacione luftarake, përfshirë edhe qitje me zjarr të vërtetë, duke përdorur sistemet e armëve të blera nga Qeveria e Kosovës.
“Gjatë ushtrimit, njësitë e FSK-së do të zhvillojnë operacione sulmuese, mbrojtëse dhe të stabilitetit. Qitjet me armë reale do të bëhen me pajisjet e reja që po blihen për ushtrinë tonë”, tha Kurti.
Ai po ashtu njoftoi se Kosova është përzgjedhur nga Ushtria amerikane për të vendosur komandën e Divizionit 28 të këmbësorisë në Zonën e Trajnimit në Babaj të Bokës. Në këtë zonë, së bashku me FSK-në, do të marrin pjesë edhe forca nga Garda e IOWA-s, Shqipëria, Kroacia, Maqedonia e Veriut dhe Bullgaria.
“‘Defender Europe 2025’ do të zhvillohet në tri zona gjeografike në Evropë dhe do të angazhojë 25,000 ushtarakë nga 29 shtete anëtare të NATO-s dhe partnerë. Në Evropën juglindore, ku bën pjesë Kosova, do të jenë 12,000 ushtarakë nga 19 vende. Kosova do të jetë nikoqir së bashku me 17 vende të tjera dhe FSK do të marrë pjesë me rreth 1,000 trupa,” theksoi Kurti.
- Advertisement -
Kryeministri në detyrë vlerësoi rëndësinë e këtij ushtrimi për forcimin e bashkëpunimit ndërmjet FSK-së dhe ushtrive partnere, duke theksuar se Kosova po dëshmon aftësinë për të organizuar stërvitje komplekse në territorin e saj.
“Kjo tregon besimin e SHBA-ve dhe partnerëve në qeverinë, Ministrinë e Mbrojtjes dhe profesionalizmin e ushtrisë sonë,” përfundoi ai.
