Kurti hap bisedimet me përfaqësuesit e pakicave për qeverinë e re

Kryeministri në detyrë i Kosovës, Albin Kurti, njëherësh kryetar i Lëvizjes Vetëvendosje (LVV), e cila fitoi zgjedhjet parlamentare të 9 shkurtit, ka nisur bisedimet me partitë politike të pakicave për të konsultuar formimin e qeverisë së re.

Ky proces ka filluar pas certifikimit të rezultateve të zgjedhjeve dhe nisjes së afateve kushtetuese për krijimin e legjislaturës dhe qeverisë së re. Presidentja e Kosovës, Vjosa Osmani, ka caktuar 15 prillin si datën për mbajtjen e seancës konstituive të Kuvendit të Kosovës.

Në një njoftim nga Zyra e Kryeministrit, është bërë e ditur se Kurti është takuar të mërkurën me kryetaren e Partisë së Re Demokratike (NDS) nga komuniteti boshnjak, Emilija Rexhepi, e cila është gjithashtu zëvendëskryeministre në detyrë. Rexhepi ka shprehur gatishmërinë për të vazhduar bashkëpunimin me LVV-në dhe ka konfirmuar mbështetjen për formimin e qeverisë së re.

Po të mërkurën, Kurti ka zhvilluar një tjetër takim me kryetarin e Partisë për Liri, Drejtësi dhe Mbijetesë nga komuniteti serb, Nenad Rashiq, gjithashtu ministër për Komunitete dhe Kthim. Gjatë diskutimit, Rashiq ka ripërsëritur mbështetjen e tij ndaj Kurtit për formimin e qeverisë dhe ka theksuar rëndësinë e vazhdimit të bashkëpunimit.

Lëvizja Vetëvendosje pret që të sigurojë 61 votat e nevojshme për të formuar qeverinë e re, por asnjëra nga partitë politike nuk ka arritur të sigurojë mjaftueshëm vota për të formuar një qeveri të vetme. Opozita, përfshirë Lidhjen Demokratike të Kosovës dhe Aleancën për Ardhmërinë e Kosovës, ka hedhur poshtë mundësinë e një koalicioni me LVV-në, ndërkohë që Partia Demokratike e Kosovës dhe Nisma Socialdemokrate nuk kanë vendosur ende kufij për mundësitë e koalicioneve.

LVV-ja, si dhe partitë tjera shqiptare që renditen pas saj, shpresojnë të mbështeten në votat e pakicave, të cilat kanë dhjetë ulëse të garantuara në Kuvendin e Kosovës. Përkundrazi, Lista Serbe, e cila ka nëntë deputetë, nuk është pjesë e përllogaritjeve për një koalicion të mundshëm qeverisës nga partitë politike shqiptare.