Kryeministri i Kosovës Albin Kurti, në intervistë për emisionin RTK PRIME, ka folur për qeverisjen e tij katërvjeçare. Për herë të parë kryeministri Kurti foli për Gjykatën Speciale, duke dhënë edhe arsyet se pse nuk shkoi t`i vizitojë udhëheqësit e Ushtrisë Çlirimtare të Kosovës. Temë tjetër ishte edhe ftesa për të dëshmuar në Prokurori, për çka Kurti tha se është i gatshëm edhe i interesuar të dëshmojë, por se ka kërkuar prej tyre, të vijnë në Kryeministri.
Kurti:Kemi pas rritje impresive të ekonomisë, 6 për qind të bruto prodhimit
Cila është tema më e rëndësishme për qytetarët që do të duhej të ishte fillimi i një interviste?
Kurti: Besoj që rritja ekonomike e cila është bërë shpërndarje sociale, është çështje e cila prek më së shumti familje dhe në të njëjtën kohë ndikon drejtpërsëdrejti te kategoritë të cilat i kanë nevojat më të mëdha, gratë, fëmijët, pensionistët por edhe studentët. Kemi pasur rritje impresive ekonomike në këto katër vite mesatarja ka qenë gjashtë për qind e bruto produktit vendor. Dhe në të njëjtën kohë kemi të hyra rekord tatimore që jam jashtëzakonisht i lumtur për shkak se tregon besimin e qytetarëve në institucione dhe njëkohësisht edhe rritjen e ekonomisë tonë nëpërmjet lulëzimit të sektorit privat. Sivjet është viti ku e kemi kaluar tre miliardë euro të hyra në buxhetin e republikës së Kosovës dhe këtu është interesant që janë 40 për qind më shumë se sa në vitin e parë të qeverisjes. Pra vështirë të gjendet një qeveri tjetër, ndoshta edhe diku tjetër ku viti i katërt i qeverisjes i ka 40 për qind në buxhetin e shtetit më shumë të hyra se sa viti i parë, ndërkohë që jemi 60 për qind më shumë se sa viti i parë para-pandemik 2019 dhe 75 për qind më shumë se viti pandemik 2020 me të cilën megjithatë s’do të duhej të krahasoheshin. Dhe këtë rritje, këto të hyra përveç që e ndihmuam sektorin privat me subvencionim të kamatave në kredi investive sidomos për makineritë prodhuese gjithashtu e shpërndamë me shtesat për fëmijë me pensione të rritura, me mbi dhjetë milionë euro përmbi dhjetë mijë bursa për student dhe gjithashtu me mbështetje për nënat lehona. Besoj që kjo është kryesorja për mirëqenien e qytetarëve.
- Advertisement -
Kurti: Fondi i tokës bujqësore është rritur 50 për qind
Cilat janë projektet e qëndrueshme të qeverisjes tuaj në ekonomi?
Kurti: Ajo çfarë ne kemi bërë është mbështetja për bujqit tanë, në bujqësi kemi një fushë në të cilën kemi investua si askush tjetër më herët dhe me këtë rast 50 për qind është rritur fondi i tokës bujqësore që punohet sot në Kosovë krahasuar me vitin 2019. 275 për qind e kemi rrit pagesat për grurin dhe në këtë mënyrë për herë të parë sivjet Kosova i ka mbuluar komplet nevojën për miell prej grurit të vet që ka prodhuar, ndërkaq për misrin i kemi pasur 119 për qind. Unë jam shumë i lumtur i kemi pasur mbi treqind milionë euro mbështetje financiare për afër 120 mijë përfitues edhe të subvencioneve edhe granteve dhe me këtë rast subvencionet i kemi pasur jo vetëm për sipërfaqen e punuar por njëkohësisht edhe për naftën për traktor edhe për plehun artificial edhe varësisht nga rendimenti, nga produktiviteti i bujqve tanë. Pra kemi pasur edhe rritje të subvencioneve për nga shkalla, por edhe shtim të tyre për nga lloji. Bujqësia ka qenë një element shumë i rëndësishëm i ekonomisë tonë në të cilën ne kemi investuar. Tjetër është që duke i mbështetur bizneset tona në forma të ndryshme prej super punës ku kemi paguar bonus për të rinjtë prej 18 deri në 29 vjeç për gjashtë muaj, të subvencionimi i kamatave për kredi investuese e deri te pjesëmarrja rekord nëpër panaire nëpër botë janë dyfishuar eksportët. Ne jemi 1.6 milionë banorë dhe tregu i jonë është relativisht i vogël për të pasur rritje të madhe të ndërmarrjeve tona, prandaj ne duhet të orientohemi nga eksportët dhe kjo ka ndodhur. Ndërkaq me sundimin e ligjit me stabilitetin institucional në Kosovë, me përmirësimin e imazhit ndërkombëtar, me liberalizimin e vizave dhe forcimin e jashtëzakonshëm të pasaportës sonë, të gjitha këto kanë ndikuar në shtimin e investimeve të huaja direkte, që janë rritur më shumë se dyfish, 134 për qind.
Kurti: Klima e të bërit biznes në Kosovë është përmirësuar
RTK: Ka dalje publike të odave ekonomike në Kosovë mungon dialogu social në mes të qeverisë dhe bizneseve të prezantuara nga odat ekonomike dhe thonë se klima e të bërit biznes është më e keqe se sa përpara. Si u përgjigjeni këtyre akuzave?
- Advertisement -
Kurti: Nëse ka ndonjë mungesë dialogu është mungesa e dialogut me oligarkët, nuk është mungesa e dialogut as me odat, as me bizneset e vogla dhe të mesme, as me bizneset e mëdha. Me oligarkët mund të mungojë dialogu dhe nuk duhet t’i ngatërrojmë gjërat. Klima e të bërit biznes në Kosovë kurrë s’ka qenë më e mirë se tash. Me ndihmën e USAID-it amerikan e kemi marrë edhe vlerësimin e parë kreditor Sovran, e kemi marrë dy B minus. Dhe klima e të bërit biznes në Kosovë është përmirësuar. Kjo mund të mos i ketë pëlqyer atyre që përpara kanë pasur favore, privilegje, kanë ardhur në zyrën e kryeministrit pa trokitur, oligarkë të ndryshëm, kjo nuk ekziston më.
RTK: Kush janë oligarkët, janë biznese të Kosovës apo si mund t’i ndajmë ne?
Kurti: Janë nja tre-katër oligarkë nuk janë më shumë edhe janë disa të tjerë rrotull të cilët mandej kanë influencën e tyre edhe në skenën mediale por përpara kanë pasur kontroll të madh në pushtetin politik. Kjo nuk ekziston më. Unë nuk besoj që çfarëdo vlerësimi objektiv në Kosovë mund ta nxjerrë Kosovën që klima e të bërit biznes sot është më keq se sa para katër viteve, para tetë viteve apo para 15 viteve, është veçse më mirë. Si bëhet pra investimet e huaja direkte që të rritën 134 për qind. Ne i kemi dikund rreth 20 mijë profesionisët në sektorin TEK të teknologjisë informacionit dhe të komunikimit, me ç’rast janë diku 15 mijë firma prominente dhe 10 për qind të tyre janë në pronësi të huaj. Pra firmat tona po blihen prej investitorëve të huaj, si është e mundur që s’ka klimë.
- Advertisement -
RTK: Nëse ndalemi të investimet e huaja direkte a janë më shumë të përqendruara në sektorin e ndërtimit edhe pronës së paluajtshme. Dhe kur flasim për pronën e paluajtshme aludohet në diasporën, të cilët vijnë, blejnë pronë të paluajtshme, banesa, lokale në Kosovë. Ndikojnë këto në këtë rritje të investimeve të huaja direkte?
Kurti: Së pari është e vërtetë që ka një dominim të sektorit të patundshmërive në investimet e huaja direkte, është diku rreth 50 për qind, mirëpo në të njëjtën kohë, edhe aty ka efektin në punësim edhe në firmat e caktuara ndërtimore. Por, në anën tjetër, kemi më shumë se dyfishim dhe nuk është duke ndodhur vetëm aty, por një numër i madh i diasporës sonë nuk janë duke blerë banesë, por janë duke hapur një degë të biznesit në Kosovë. Ka njerëz të diasporës që po kthehen në Kosovë. Për herë të parë në këto katër vite keni familje që kthehen në Kosovë.
RTK: Pse nuk ka pasur asnjëherë më përpara familje që janë kthyer?
Kurti: Nuk janë raste anekdotike. Janë reprezentative. Ka shumë familje që po kthehen, në Kosovë, ka kthim nga diaspora. Unë s’po them që ata janë duke u kthyer veç për shkak se Kosova ka qeverisje të mirë e demokratike tani, ata po kthehen për shkak se edhe në Evropë situate nuk është si dikur. Pra, Gjermania është buzë resecionit dhe nuk është më Gjermania e viteve 90-ta, kur kanë shkuar njerëzit vitet e 90-ta nga Kosova, kanë shkuar për shkak se këtu ka qenë apartheid që kulmoi me gjenocid, varfëri e skajshme e kështu me radhë. Tash kjo gjendje nuk është më në Kosovë. Ka ndokush që shkon por unë mendoj që e kemi dukurinë e kthimit. Më herët kemi pasur kthim sporadik, tash ka dukuri të kthimit në Kosovë dhe mendoj që kjo është shumë mirë.
RTK: Në një studim të UNDP-së që është publikuar në 2024 është folur për ndikimin e inflacionit që tash ka rënie por ka qenë në shifra të larta në Kosovë në shportën e konsumatorit. Dhe sipas qytetarëve, dikund sipas këtij studimi për 200 euro është rritur blerja e produkteve bazë në shportën e konsumatorit dhe kjo është një shqetësim i qytetarëve. Si e lexoni këtë kryeministër?
Kurti: Inflacioni i përgjithshëm këto katër vite, nëse nuk jam gabim është rreth 22 për qind, është shumë më ketë në plotë vende në Evropë ku ne s’jemi anëtarë ende, si Bashkim Evropian. Po, ka rritje të çmimeve se e tregojnë edhe marketet tona, po në aspektin kumulativ është 22 për qind. Ndërkaq rritjet ekonomike që po i them unë janë pasi të hiqen prej inflacionit. Janë rritje reale ekonomike. Nuk janë rritje duke e pasur inflacionin brenda. Dhe rritjet ekonomike që i kemi realizuar ne janë pa borxh të ri. Kosova borxhin publik e ka vetëm 17 për qind të bruto produktit vendor. Kjo e ka bërë qeverinë tonë shumë autonome, shumë të fuqishme edhe në negociata politike edhe financiare. Ne për shembull kemi marrë borxh prej institucioneve financiare ndërkombëtare me kamatën më të ulët edhe se Gjermania, kemi marrë borxh të mençur, se njeriu nuk duet të marrë borxh veç atëherë kur është i dëshpëruar për borxh, sepse atëherë kamatat janë të larta. Ne kemi marrë borxh të mençur produktiv kur nuk është dukur që edhe po na duhet shumë. Edhe sot paguajmë kamatat të cilat janë shumë më të ulëta se sa ekonomia kryesore e Bashkimit Evropian, Gjermania.
RTK: Për të hyrat nga tatimet që janë rritur ishte dikund 40 për qind që e thatë. Janë edhe për shkak të kësaj rritjes së çmimeve kryeministër?
Kurti: Nuk shpjegohet me rritjen e çmimeve rritja e të hyrave tatimore. Shpjegohet me besimin shtesë të popullit në institucionet e sistemit edhe shpjegohet me punën me disiplinë të shtuar të Administratës Tatimore të Kosovës, edhe shpjegohet me bizneset e Kosovës të cilat e kanë kuptuar që ka filluar një kapitull i ri dhe preferojnë të mos i kenë nga dy parë libra, një për shtëpi e një për Administratën Tatimore.
RTK: Po me thoni kjo krejt është çështje e besimit të një qeverisjeje të re, jo që mund të kalkulohet me numra të tjerë, për shembull se si mund të mbushet buxheti në ATK?
Kurti: Faktori kryesor është mungesa e korrupsionit, sepse kur e sheh populli që kryeministri nuk po pasurohet me vëllezër qysh ka ndodhë në të kaluarën, kur e sheh populli që ministrat janë jo vetëm të pa korruptuar, por edhe të pa korruptueshëm, është shumë më i gatshëm më kontribuua, sepse ti nuk kontribuon kur e sheh që po vidhet atje, pikërisht duke e parë që nuk po vidhet atje kanë kontribuar më shumë.
Kurti: Kishte një mësymje të prokurorisë tek ministrat tanë, por …
RTK: Ju keni garantuar luftën ndaj krimit dhe korrupsionit dhe ardhja në pushtët ka ardhur me këtë nga Lëvizja Vetëvendosje. Ju kam dëgjuar disa herë kryeministër që të thoni që qeverisja Kurti nuk është e korruptuar edhe mund ta kuptoj kur flisni për veten sepse secili e di punën e tij, por pse garantoni për ministrat e tjerë të cilët i keni në kabinet, pse jeni kaq i bindur që njëri prej tyre nuk ka bërë keqpërdorim të detyrës zyrtare?
Kurti: Kishte disa mësymje të prokurorisë te ministrat tanë dhe në fund përfunduan në raste procedurale, që do të duhej të ishin civile administrative jo penale. Por pikërisht për të arsyetuar veten filloi një lloj persekutimi. Paramendoni po të kishte pasur korrupsion te ne çka do të na bënin, këtë na e kanë bërë duke mos pasur korrupsion.
RTK: Pse e thoni këtë kryeministër?
Kurti: Pse nuk ka korrupsion.
RTK: Pse e thoni çfarë do të na bënin? Ka pasur disa afera nëse mund t’i quaj të tilla, proceset gjyqësore nuk kanë përfunduar dhe unë jam e prirur të mos flas për fajësinë e këtyre. Ka raste të hapura të ambalazhuesve të ujit, është afera e vajit dhe grurit, është rasti i KEK-ut të z.Krasniqit e raste të tjera të përmendura. Pse e thoni që këtë e kanë veç pse kanë dashur të gjejnë te ju?
Kurti: Drejtor, kryeshef Krasniqi, 105 milionë euro fitimi i KEK-ut në vitin 2022. Ky i ka çmendur kundërshtarët tjerë, një pjesë e madhe e të cilëve janë në prokurori. Dhe ky sulm që është bërë ndaj drejtorit është bërë për shkak të suksesit të tij, jo për shkak të dështimit të tij. Dhe tash rasti është komplet procedural, jo i ke nënshkrua kontratat ose dokumentet e caktuara me kohë ose jo. Çështje procedurale.
RTK: Kemi autostrada për të cilat ka pasur korrupsion dhe ka pasur vendime!
Kurti: Ama aty janë miliardat. Këtu i ke 105 milionë fitim për shtetin, atje janë për privatin, 105 milionë euro ndërmarrjes publike i ka siguruar fitim.
Kurti: Telekomin e kemi marr me 11 milionë euro borxh, tani del me 7 milionë fitim
RTK: Nuk do të thotë që kjo ia lejon për të nënshkruar çkado!
Kurti: Nënshkrimet janë krejt të duhura vetëm a i ka bërë me kohë, a e ka mbrojtur ndërmarrjen publike? Nuk i ka ndihmuar privatit, i ka ndihmuar edhe ka bërë negociata tejet interesante me bankat për interesin e depozitave të KEK-ut. Ndërkaq, në anën tjetër, për shembull Telekomin e Kosovës e kemi marrë me 11 milionë euro borxh, në anën tjetër sivjet do të dalë më 7 milionë euro fitime. Prej 11 milionë eurove borxh në 2021-shin po e nxjerrim Telekomin në 2024-shin me 7 milionë euro fitim. Ndërkohë e kanë rrjep me oligarkët si puna e Devollëve me Z-mobile edhe me makinacione nga më të ndryshmet në procese gjyqësore ku qartazi bëhet persekutimi i Telekomit të Kosovës për ta zhvatur sikurse në të kaluarën. Ne këtu i kemi rimëkëmbë ndërmarrjet publike. Prej 17 ndërmarrjeve publike qendrore vetëm dy kanë operuar pa humbje.Ssot më shumë se gjysma operojnë pa humbje, fitimet dallojnë.
RTK: Në anën tjetër kryeministër në deklaratat e juaja për këtë punën e punësimeve, sepse do të flasim edhe për papunësinë, po për të bërë këtë dallimin e qeverisjes tuaj më qeveritë e kaluara, që zakonisht e diskutoni, ka pasur edhe tituj të tipit dhëndri i këtij, gruaja e vëllait të këtij. Dhe mbaj mend deklaratën tuaj që ata janë për dasma e jo për institucione. Pse dolën këta tituj në qeverisjen tuaj?
Kurti: Tituj në cilat portale?.
RTK: Ka pasur edhe në Kuvend, kanë qenë anëtarë të bordit të cilët kanë pasur një lidhje familjare!
Kurti: Këta janë tituj të portaleve. Ne jemi në televizion publik. Televizioni publik, gazetarët publikë janë tjetër kategori për bindjen time. Për portalet sot në Kosovë në të vërtetë duhet të pyesësh kush është pronari. Prandaj ne edhe mendojmë që në Kosovë ka nevojë të bëhet Byroja për Konfiskimin e Pasurisë së Pajustifikueshme. Çfarë titujsh po shfaqen nëpër portale e të mi sjellë mua në televizion publik nuk është në rregull.
RTK: I sjell, sepse është në interesin e qytetarëve për t’i ditur përgjigjjet e kryeministrit. A ka punësime familjare? A garantoni që nuk ka pasur punësime familjare?
Kurti: Nuk ka punësime familjare. Askush nuk punësohet pse është kushëri i dikujt. Ne nuk ia kemi ndaluar të gjithë kushërinjve që të aplikojnë. Nuk mund ta marr unë një vendim që t’ja ndaloj dikujt që të aplikojë.
Kurti: Papunësia ka rënë nga 26 për qind në afër 11 për qind
RTK: Pse përpara i keni kritikuar?
Kurti: Po në këtë ndërtesë (ndërtesa e qeverisë) problemet kanë nisur në krye. Në këtë ndërtesë ku jeni ju sot asnjëri prej dy vëllezërve te mijë e as prindërit e mi nuk kanë hyrë kurrë që katër vite. Asnjë Kurti s’ka këtu, as Tahiri nga mbiemri i nënës sime. Unë nuk mundem që gjithandej nëpër komuna e nëpër ministri, nëpër drejtori nëse ka aplikuar dikush dhe ka fituar në një garë të barabartë ta privojë nga një mundësi e tillë. Por, nuk është kriter afërsia farefisnore që të bëhet. Por, ta keni parasysh shumica dërrmuese, për mos thënë bash të gjitha sulmet e portaleve private, jo publike të televizionit publik, po të portaleve private, janë për shkak se janë kundër qeverisë, për shkak se janë për ata që kanë qenë para neve. Këto portale që i nxjerrin këso tituj janë për atë qeverinë e vjetër zonja Fitore po ka shkuar tash. Çka të bëjmë!. Zoti i lashtë shëndoshë!.Ka shkuar ajo qeveri.
RTK: Keni thënë që është ulur numri i papunësisë. Çka mendoni që ka ndikuar në këtë ulje të papunësisë?
Kurti: Prej afër 26 për qind ka rënë afër 11 për qind. 350 mijë të punësuar i kemi pasur në pranverën e vitit 2021, 430 mijë të punësuar i kemi sot që po flasim .80 mijë të punësuar më shumë, që i bie 22 për qind më shumë është rritur punësimi.Sidomos të gratë dhe te rinia. pra kemi dyfishim të punësimit të rinisë dhe ajo që ja vlen të theksohet është rritë paga mesatare. Paga mesatare në sektorin privat nga pranvera e viti 2021 deri në fund të vitit 2023 është rrit 34 për qind. Ndërkaq për pagën mesatare në sektorin publik, ajo do të shkojë tek 50 për qindëshi si rritje. 55 euro shtohen në janar të vitit të ardhshëm dhe më një korrik të vitit 2025 edhe 55 euro tjera.
RTK: A ka ndikuar në rënie të papunësisë formalizimi i vendeve të punës dhe migrimi i popullsisë?
Kurti: Ka ndikuar formalizimi i vendeve të punës, mund të ketë ndikuar edhe migrimi ,por unë mendoj që migrimin më të madh ne e kemi pasur në vitet 2014-2015.
RTK: Apo tani pas liberalizimit të vizave, në kuptimin e shfrytëzimit të drejtës së tyre për të punuar?
Kurti: Edhe faktorët ndërkombëtarë neve po na e vërtetojnë, që brengat e tyre, që nëse liberalizohen vizat për qytetarët e Kosovës, do të ketë ikje masive, ka dalë që kanë qenë brenga të pavërteta. Dhe ne që kemi argumentuar, që duhet ta kemi liberalizimin e vizave, sepse nuk do të ketë dalje më të madhe të popullsisë, përkundrazi do të mund të dalin por si turistë dhe kthehen, sepse vetëm 90 ditë brenda 180 ditëve nuk ke mundësi të qëndrosh atje pafundësisht. Në anën tjetër, unë besoj se nuk ka migrim edhe për shkak të krizës nëpër të cilën po kalon vetë Bashkimi Evropian. Ka raste kur kanë provuar njerëzit të punojnë jashtë dhe shumë shpejt e kanë marrë vesh se me shumë se gjysma e të ardhurave shkon për qira. Në Kosovë 95 për qind, sipas Agjencisë së Statistikave të Kosovës, që e bëri regjistrimin e popullsisë, që e konsideroj një ndër të arriturat më të mëdha jo vetëm të këtij viti, por edhe të mandatit tonë, 95 për qind në Kosovë banojnë në pronën e tyre. Ne jemi popull për nga struktura i pronarëve të vegjël. Vetëm 5 për qind banojnë me qira. E kemi edhe në kulturë edhe në traditë ekonominë e vogël, përveç këtyre oligarkëve. Në anën tjetër, situata në perëndim ku shumica paguajnë qira, aty një pjesë e madhe e të ardhurave i shkon një pronari që as nuk e njeh prej të ardhurave tuja.
Kurti: Gjykata Kushtetuese na ka bërë shumë dëm
RTK: Ju banoni me qira. A vlenë në kjo përqindjen e qirasë edhe për ministrat tuaj?Në deklarimin e pasurisë nuk janë keq kryeministër, në kuptimin edhe të pronave të mëdha e jo vetëm të atyre të vogla?
Kurti: Çka bëjë unë është publike, çka kanë ministrat është publike. Shumë është me rëndësi që kjo të bëhet publike edhe për shumë të tjerë në vendin tonë sepse ministrat po dihet çka, bile edhe deputetët po dihet. Byroja për Konfiskimin e Pasurisë së Pajustifikueshme duhet të tregojë prejardhjen e parasë së shumë njerëzve në shoqërinë tonë, mbi atë se prej nga e kanë pasurinë. Unë nuk jam kundër pasurimit të njerëzve, por duhet të jetë me dije. Punë me djersë,e jo me korrupsion.
RTK: Byroja dhe disa ligje të tjera të qeverisjes Kurti dhe të mazhorancës parlamentare sepse kanë ardhur nga Kuvendi i Republikës së Kosovës kanë përfunduar në Gjykatën Kushtetuese. Edhe në intervistën e fundit që ne e kemi pasur bashkë në kryeministri jeni deklaruar për këtë nëse mund ta quaja komunikimin ose bojkotin jo të drejtë me Gjykatën Kushtetuese. Pse një gjuhë e tillë e cila thënë të drejtën, jo nga portalet, por nga shoqëria civile që merret me sundimin e ligjit, nga organizata të rëndësishme në Kosovë e kanë kritikuar këtë gjuhë tuajën karshi Gjykatës Kushtetuese. Pse keni vendosur të komunikoni kështu publikisht me Gjykatën Kushtetuese?
Kurti: Po unë jam zyrtar i shtetit. Unë privatisht nuk komunikoj. Komunikoj publikisht dhe Gjykata Kushtetuese na ka bërë shumë dëm. Me ankesat që i ka bërë në Gjykatë Kushtetuese opozita nuk ka fituar asgjë,por ne kemi humbur. Sot që po flasim, një vjet e katër ditë Fondi Sovran i Republikës së Kosovës është i ngujuar në Gjykatë Kushtetuese. A e di çka do të thotë një vit kohë për një pikë gjashtë milionë njerëz. Është dëm shumë i madh kjo vonesë.
RTK: Ju e keni me afatet kohore apo me përgjigjet që i ka dhënë Gjykata Kushtetuese? A janë ata brenda mandatit të tyre?
Kurti: E kam edhe me afatet kohore, edhe me përgjigjet e tyre, edhe me faktin që i kanë konsideruar të pranueshme. Kur të miratohet një ligj që shkon në Kuvendin e Republikës ka kaluar nëpër Komisionin Parlamentar për Legjislacion. Kush ka probleme me ligj adresohet në Komisionin Parlamentar për Legjislacion. Çdo ligj e kanë lëshuar në Gjykatën Kushtetuese dhe Gjykata Kushtetuese krejt i bënë të pranueshme. Kur kamë qenë unë në opozitë Gjykata Kushtetuese shumë vështirë e konsideronte të pranueshme një ligj.Thoshte ne nuk mermi me këtë gjë.
RTK: Asociacionin e ka hedhur poshtë Gjykata Kushtetuese?
Kurti: Në vitin 2013 thoshte ne nuk merremi me të. Në 2013 unë e kamë dërguar. Kur Lëvizja Vetëvendosje e ka dërguar në 2013 Asociacionin, kanë thënë nuk merremi me këtë gjë.
RTK: Kryeministër, ju e keni profesionale, ata personale, po më thoni? Ju në opozitë nuk keni funksionuar si duhet me ata! Tani as në pozitë !Po më thoni që mund ta kenë vijë politike?
Kurti: Janë të njëanshëm. Byroja për Konfiskimin e Pasurisë së Pajustifikueshme u rrëzua pesë me katër.Reforma e Këshillit Prokurorial të Kosovës po ashtu u rrëzua. Cmimet tavan për produktet bazë, ankesa e juaj për inflacion e ka këtë përgjigje. Nuk do ta kishim ne as këtë problem sikur ta kishim për çmimet tavan.
RTK: Te çmimet tavan kryeministër, kryetarja e Gjykatës Kushtetuese, e cila është në fund të mandatit tani, mund të ketë gjykatës të rinj aty që do të ishte edhe pyetja ime e radhës? Kush do të jenë këta gjykatës. Nëse flasim për profesionalizmin, tha se ligji për çmimet tavan nuk është antikushtetues. Ka thënë që kryeministri dhe ministri ia kanë vënë përgjegjësitë vetes, por jo një organi mbikëqyrës për t’i rregulluar ligjet tavan në treg dhe po ashtu, e dyta, si vendim, ligjet të cilat janë ekzistuese nuk janë ndryshuar dhe plotësuar karshi këtij ligji për çmimet tavan në treg. Cila është përgjigja për këtë?
Kurti: Nëse nuk është më gjykatëse aty, tani mund të garojë dhe të na tregojë se si bëhen politikat fiskale. Për këtë garohet në zgjedhje. Si mblidhen të hyrat dhe si shpenzohen të hyrat për këtë garohet në zgjedhje. Ajo është krejt gabim dhe na ka bërë shumë dëm. I ka bërë shumë dëm popullit të Kosovës. Në vend që Kosova sot të ketë çmime tavan për produkte bazë, sot nuk kemi çmime bazë dhe neve na është dashur që me shumë metoda të tjera sociale ta zbusim varfërinë, gjendjen e rëndë të qytetarëve, pikërisht për shkak se operatorëve ekonomikë, rrjeteve tregtare nuk mundnin t’ua vinin çmimin tavan, në shërbim të të cilëve direkt ose indirekt doli Gjykata Kushtetuese.
RTK: Nuk e keni menduar që ndoshta mënyra se si është përpiluar ligji mund të zgjidhej në një formë, tjetër që kjo vendimmarrja mos të ishte te ju dhe te ministri, po të krijohej organi mbikëqyrës që do ta rregullonte këtë?
Kurti: Unë po shohë shumë njerëz që kanë dëshirë të merren me politikë. Po kanë dëshirë të merren me politikë edhe gjykatësit edhe prokurorët, edhe gazetarët. Po hyni në garë zgjedhore. Aty është vendi, aty është plotë gjallëri politik-bërja. Nuk mund të merresh me politikë prej pozitës së gjykatëses se nuk është fer. Edhe ky populli i jonë është shumë i vuajtur për t’ia bërë çfarë i kanë bërë ata.
Kurti: Unë jam i gatshëm të dëshmoj, por le të vijnë në kryeministri
RTK: Prokurorët ju kanë thirrur si dëshmitar. Nuk e keni refuzuar kërkesën, keni thënë se jeni i gatshëm, por të vijnë këtu në kryeministri. Kjo për shkak të agjendës kryeministër, për shkak të arsyeve tjera që nuk mund t’i përgjigjeni Prokurorisë, apo cila është përgjigjja?
Kurti: Unë jam edhe i gatshëm, edhe i interesuar të dëshmoj, por kam kërkuar prej tyre, ashtu siç kamë bërë në të kaluarën të vijnë në kryeministri. Edhe më herët kanë ardhur. Kanë ardhur për raste të tjera kur kanë qenë shumë më të rënda si dëshmitar ndoshta jo. Gjatë mandatit të qeverive të tjera jo mua. Por nuk dihen ato. Ata i dinë se të njëjtit janë. Këtu ka ndërruar kryeministri, por atje nuk ka ndërruar gjë. Ky është dallimi.
RTK: Pse po dëshironi që ata të vijnë për ju edhe si dëshmitar?
Kurti: Unë nuk po dëshiroj që ata të vijnë, unë po ju tregoj që nuk shkoj. Nuk shkoj sepse e kam shumë të qartë planin e tyre. Ata po dëshirojnë që ta prodhojnë një xhirim të shkurtër, ose një fotografi , që .kryeministri më i pa korruptuar në Ballkan duke hyrë në ndërtesën e Prokurorisë Speciale për një rast korrupsioni. Kush nuk merret a je dëshmitar a i pandehur. Edhe mua tash po më trajtojnë si i pandehur. Nuk e di a e ke vërejtur. Edhe me disa portale të tyre se rrotull prokurorisë janë do kafe ku rrinë këta me gazetarë të këtyre portaleve që i nxjerrin edhe titujt për ministrat e mi. Të njëjtit janë. Pra, prokurorët pinë gjithë ditën kafe me disa gazetarë të caktuar të portaleve të oligarkëve që krijojnë tituj për ministrat e qeverisë Kurti dhe ata po dëshirojnë ta prodhojnë një fotografi të tillë për mediet ndërkombëtarë. Unë nuk jam aktor, por nuk do të pranojë ata të jenë regjisor.
RTK: Por nëse vijnë këtu dhe nëse pranojnë ju jeni të gatshëm t’i përgjigjeni?
Kurti: Këtu lë të vijnë. Këshilltarja ime juridike ua ka dërguar opsionet.
RTK: Por në një shtet demokratik a do të duhej kryeministër që të veprojnë në këtë formë?
Kurti: Në një shtet demokratik nuk ka kësi prokurorie. Prokuroria përbrenda ka një sistem hierarkik me të cilin nuk mund të krahasohet as ushtria e Kosovës, FSK-ja. Aq shumë është hierarki e rreptë me kupolën e Këshillit Prokurorial të Kosovës në maje, saqë asi lloj rigjiditeti në hierarki nuk ka as FSK-ja. Pra, aty vendos një klikë e njerëzve me në krye, Blerim Isufaj.
RTK: Duhet që të përmendet me emër dhe mbiemra zoti kryeministër kryeprokurori që nuk është i pranueshëm nga qeverisja juaj?
Kurti: Shikoni 200 prokurorë i ka Kosova, 120 prej tyre i kanë më shumë se tetë vjet përvojë pune. Këshilli Prokurorial si klikë po thotë ose ky, ose as njëri. As zonja, presidentja Osmani, as kryeparlamentari Glauk Konjufca, as unë si kryeministër nuk jemi dakord me këtë person. Ne jemi subjekti që ka numrin më të madh të votave në pluralizmin politik në historinë e Kosovës.Kur tre liderët kryesorë shtetërorë nuk janë dakord që ky person të bëhet kryeprokuror, pse ai insiston. Kush po na e mbështetë këtu. Edhe unë nuk kam se si ta kuptojë kështu, përveçse me atë çka ka ndodhur para një viti kur publikisht e pranoi që ja ka hequr urdhër-arrestin Millan Radojiçit. Ne nuk mund të pranojmë kurrë të bëhet prokuror dikë që ia ka hequr Millan Radojiçiqit urdhër-arrestin. Çka t’ i themi familjes së Afrim Bunjakut. Me i thanë familjes së tij se ky që ia hoqi urdhër-arrestin Radojiçiqit që ja u vrau juve babën dhe burrin e vëllanë, ne po e bëjmë kryeprokuror. Pse nuk shkon ky njeri. Pse insiston Këshilli Prokurorial prej 120 prokurorëve që kanë të drejtë, o ky, o asnjëri. Këtu është një kalbëzim i thellë me të cilin unë po merrem me aq sa di e mundem. Është interesant se mediet merren shumë pak me të. Unë jap llogari edhe popullit, po ata kujt po i japin llogari në Këshillin Prokurorial.
Kurti: Në Këshillin Prokurorial të zgjidhen profesionistë
RTK: Si e mendoni këtë funksionim tutje sepse ata do të jenë aty?
Kurti: Po na duhet një shumicë edhe më e madhe më 9 shkurt. Duhet një nga një Këshillin Prokurorial të zgjidhen profesionistë. Unë mendoj që është mirë ta hapim për njerëz të rinj, ta rrisim mobilitetin e brendshëm në Prokurori se ka plotë të mirë por i lënë poshtë. Ka shumë prokurorë të mirë në Kosovë, por nuk ka shanse të ngjiten ata lartë. Prokurorët më tregojnë se Blerim Isufaj me kllapën e tij na e japin rastin vetëm kur është para dështimit. Pra, ata ja dhënë një rast njëri-tjetrit dhe kur nuk ecën mirë rasti ta dhënë ty, që të dështua ti. Ndërkaq kur është rasti i ndjeshëm nuk ka shanse pët të ta dhënë.
Kurti: Edhe Radojiçiqin po mos ta gjironim, s’do ta pranonin se kush e ka bërë sulmin
RTK: Pas sulmit në Ibër-Lepencë pati një reagim të madh ndërkombëtar edhe të ambasadave, edhe të shteteve mike të Kosovës, por të kujdesshëm secili prej tyre për të aluduar në sulmuesin. Pse?
Kurti: Pikërisht kur u përballa edhe unë me këtë qëndrim për mendimin tim absolut të përpjekjes për të mos e fajësuar Serbinë, ajo që më ka ra ndërmend është se me gjasë po mos ta kishim ne atë dronin që e gjiroi Millan Radojiçiqin me bandën e tij paramilitare, kriminale në Banjskë, ndoshta kishin thënë edhe nuk dihet kush e ka bërë edhe Banjskën. Por droni ynë e gjiroi Milan Radojiçiqin dhe ata rrotull aty “Little greern men”, pra, “njerëzit e vegjël të gjelbër”, njësoj sikurse në Krime edhe ne Donbas. Kur i gjiruam nuk patën çfarë të thonë. Kam një farë përshtypje që me bë mos me e pas pasur ne atë dron më datën 24 shtator 2023, ndoshta edhe sot e kësaj dite kishin thënë se nuk e dimë kush e ka bërë. Ndoshta nuk e ka bërë Radojiçiqi! ? Tash çka po i bie kjo!? Që ne nuk na qëlloj një farë droni në shtatë në mbrëmje kur kriminelët prapë të Radojiçiqit, unë e mbajta një konferencë për shtyp me shtatë faqe dëshmi,.Krejt indikacionet të çojnë në atë drejtim të grupi i Radojiçiqit dhe nuk ka shanca që Serbia mos me qenë mbrapa kësaj pune. Nëse nuk është veç Serbia është edhe Rusia. I kemi gjetur 74 emblema 20 prej tyre janë ruse dhe çka? Njëra prej tyre UÇK dhe tjetra USA Arm. Kjo është e qartë. Gjithçka tregon në atë drejtim. Por me duket që partnerët tanë ndërkombëtarë nuk po duan ta fajësojnë Serbinë, e neve për sherr nuk na qëlloi një dron në ato momente përmbi kanal.
RTK: Më i zëshëm ka qenë ambasadori i Amerikës në Beograd, citimi:”Nuk të çojnë rrugët në Beograd”, duke mos aluduar që mund të jetë Serbia prapa kësaj. Si e keni lexuar këtë deklaratë kryeministër?
Kurti: Komplet materialin e konferencës për media që unë e mbajta bashkë edhe me aneks të fotove e të mesazheve që i kemi interceptuar në komunikim të grupit të Radojçiqit, unë e kam përkthyer në anglisht dhe ia kam dërguar edhe ambasadorit Hill në Beograd.
RTK: Dhe keni marrë ndonjë përgjigjeje?
Kurti: Jo nuk kemi marrë, por shpresoj që nuk deklaron më ashtu.
RTK:Pse vendosët të dilni në konferencë për shtyp kryeministër me të dhëna të tilla?
Kurti: Unë jam konsultuar edhe me drejtorin e Agjencisë së Kosovës për Inteligjencë, Petrit Ajetin edhe me ministrin e punëve të brendshme Xhelal Sveçlen edhe jam siguruar që gjithçka që kam prezantuar me asgjë nuk e cenon asnjë burim tonin të informacionit dhe asnjë pistë të hetimit.
Kurti: Beogradi bëhet nervozon dhe agresiv për të arriturat në veri të vendit
RTK: Kjo është në të drejtën e kryeministrit jo të prokurorit!
Kurti: Deri kur me i prit prokurorët, një vit u dashtë për me ia ngrit aktakuzën Milan Radojiçiqit. Një vit mos me ja ngrit aktakuzën Milan Radojiçiqit S e shpjegojmë ne këtë gjë!?! Pse e kemi një prokurori që së pari e ka hequr urdhërarrestin. Prandaj edhe kanë vonuar një vit për t’ja ngritur aktakuzën.
RTK: Temë tjetër e veriut ka qenë hapja e urës, çështja e dinarit, mbyllja e postave… Por te dinari ka pasur prapë një reagim të madh ndërkombëtar. Eshtë aluduar që mund të hapen në fund të verës.Ishte një vizitë e shefit të CIA-s Wiliam Berns, u duk një farë koordinimi. Patët koordinim për urën kryeministër?
Kurti: Së pari nervoza që ekziston në Beograd dhe bëhet agresivitet është për shkak të arriturave tona në veri. Ju e dini që ne e kemi mbyllur edhe bankën popullore të Serbisë dega në Kosovë edhe drejtorinë e thesarit në Leposaviq, edhe të gjitha strukturat ilegale të sigurisë administrative të tjera dhe të komunave paralele praktikisht janë duke u mbyllur.Nuk ka më as targa, as letërnjoftim, as patentë shofer ilegal. Me mijëra qytetarë serbë i kanë konvertuar në ato zyrtare. Por nuk jemi ndalur me kaq .Ne i kemi hapur zyrat kadastrale atje për shembull, pastaj zyrat për regjistrimin e bizneseve, pensionale, punësimit, të inspektoratit të punës i kemi hapë zyrat edhe pikat e postës në katër komunat veriore përfshirë edhe Jarinjën edhe Bërnjakun, pra po e normalizojmë gjendjen. Kemi numër të madh të bizneseve që po hapen atje. Jem duke ju afruar numrit prej 300 bizneseve, pra nuk është vetëm çështje policie, por çështje edhe socioekonomike që po veprojmë atje. Për çështjen e urës unë mendoj që do të hapet ura, por ne nuk duam që të vijmë në përplasje me KFOR-in, e sidomos me karabinierët italianë aty. Për çdo javë ne punojmë në këtë drejtim. Të gjitha i kemi kryer.
RTK: Nuk keni ardhur në një përfundim me KFOR-in, sepse ata thonë që kjo duhet të shkojë përmes dialogut. Kjo nuk është e mundur kryeministër?
Kurti: Dialogu është kryer me marrëveshje. Si me shkuar përmes dialogut?. Marrëveshja është e muajit gusht të vitit 2016, e cila thotë që më së largu me 20 janar 2017 duhet të hapet ura. Pra nuk mund të flasim për një dialog kur tashmë kemi marrëveshje. Nëse flasim për dialog përkundër marrëveshjes ne e shkelim marrëveshjen. Edhe kjo është e rëndësishme të respektohet. Unë besoj që do ta hapim edhe urën po gjëja kryesore që kemi bërë në këtë periudhë është mbyllja e krejt strukturave ilegale, e aksioni më irëndësishëm gjersa ishte shumë aktuale tema e hapjes së urës është me 30 gusht kur ato strukturat paralele në veri.
RTK: Dhe kjo nuk ka kaluar as nga mediat pa u përmendur kjo pjesa e strukturave kriminale. Por ajo që është diskutuar kryeministër është se a ka sovranitet të plotë sot Kosova edhe në atë pjesë, edhe a mund të quhet sovranitet nëse ka, apo nuk ka integrim të serbëve lokal? Komunikimi me serbët lokal të cilët kanë qenë të strukturuar edhe te mbikëqyrur edhe nga Serbia edhe kur kanë dalë nga institucionet. Sa kemi mbërri ne me komunikua me ata serbë të cilët dëshirojnë të jenë qytetarë të Kosovës?
Kurti: Prej teorisë e besoj që edhe praktika s’ka se si te jenë të ndryshme. Sovran është shteti, populli është burim i sovranitetit, shteti është sovran nuk është populli sovran, populli është burim i sovranitetit, populli duhet të ketë liri dhe të drejta, popullit duhet t’i sjellin mirëqenie dhe zhvillim. Pra populli nuk është sovran populli është burim i sovranitetit, shteti është sovraniteti është e drejta e shtetit. Unë besoj që për sovranitet të plotë kurrë s’ka pasur më shumë se tash në veri të Kosovës. Por ajo që është më e rëndësishme për neve është që ky sovranitet shtetëror në veri të Kosovës është në përputhje me ligjin dhe Kushtetutën, jo në kundërshtim me to, sepse ka shtete të cilat shkelin ligje e shtrin sovranitet. Ne kemi respektua ligje dhe kemi përfitua sovranitet si shtet. Kjo është shumë e vlefshme, prandaj është fasionuse çka ka ndodhë në këto katër vite. Do të thotë kemi zbatua ligjshmëri dhe kemi përfitua sovranitet për shtetin dhe integritet territorial për Republikën.
RTK: Ai kanë pranua këto serbët e asaj pjese? A kanë arrit me pranua atë ligjshmërinë të drejtën e shtetit për me shtri sovranitetin?
Kurti: Unë besoj që ata janë gëzuar largimit të strukturave ilegale të Serbisë. Me qenë se ato kanë qenë shantazushe, frikësuese, kërcënuese e kështu me radhë, por në anën tjetër, nuk mund të them që kanë entuziazëm për kryeministrin Albin Kurti, sepse tabloidet në Beograd mua më kanë në ballinë çdo ditë tash e tri vjet. Nuk ka person që del në balin në media në Serbi përveç presidentit të tyre më shpesh se unë. Vazhdimisht mu me nxjerrin në ballina në Beograd më shumë se sa liderët e opozitës atje. Pra ata nuk e kanë informimin korrekt edhe çlirimi nga frika prej strukturave ilegale është pasuar më një entuziazëm për qeverisjen e mirë e demokratike. Ka shumë punë për të bërë, por bashkë me ministrin Nenad Rashiq kemi bërë projekte si asnjëherë më parë. Dhe mos harroni serbët po i raportojnë incidentet që i kanë atje. Krahasuar me para tri viteve vetëm 10 për qind është më pak numri i raportimit të incidenteve me fqinjët, të dhunës në familje, të problemeve në sferën publike e kështu me radhë. Do të thotë ata po integrohen, më herët nuk ka pasur integrim, ka qenë një farë lloj bashkëngjitje me strukturat që u shkoqitën me pesë nëntor 2022. Tash mendoj që është integrimi i vërtetë.
Kurti thotë se para dialogut duhet të vijë drejtësia për Banjskën
RTK: Keni vënë tre kushte për tu ulur në tavolinë më Vuqiçin dhe nuk ka pasur një takim në nivelin e kryeministrave, por ka qenë zëvendëskryeministri Bislimi dhe Petkoviq. Dialogu pas Banjskës kryeministër, mund të thuhet që ka qenë më shumë menaxhim i krizave, jo normalizimi i marrëdhënieve, apo si e mendoni ju?
Kurti: Po, pas Banjskës duhet drejtësia për Banjskën. Nuk duhet dialogu për Banjskën. E drejtësia për Banjskën fillon me dorëzimin e Milan Radojiciqit. Kjo është shumë e rëndësishme për ne, është e pa kapërcyeshme, Milan Radojciqin duhet me jua dorëzua autoriteteve të Kosovës, më në fund ka aktakuzë, ka edhe urdhërarrest, shpresoj që nuk ja heqin edhe ai duhet ti dorëzohet autoriteteve të Kosovës. Tjetra është që si ta vazhdojmë dialogun kur ekziston qajo letra e ish-kryeministres Bërnabiq e 13 dhjetorit të vitit të kaluar, ku ajo 27-tes së Bashkimit Evropian i thotë praktikisht që pavarësisht marrëveshjes bazike që e kanë bërë presidenti i Serbisë me kryeministrinë e Kosovës integriteti territorial i Kosovës nuk do të respektohet. Si mundesh me vazhdua dialogun me dikë që thotë se nuk ta respektojë integritetin tënd territorial, qajo letër duhet të tërhiqet. Edhe tjetra marrëveshja bazike, nëse më të vërtetë e pranojmë marrëveshjen bazike, e cila nuk është marrëveshje e shkëlqyeshme, as shumë e mire nuk është, është marrëveshje e mirë okej marrëveshje është, por e kamë bë atë marrëveshje edhe e marr përgjegjësinë për atë marrëveshje, atë marrëveshje le ta nënshkruajmë se vetëm qashtu kemi garancion për siguri juridike për të ardhmen dhe njëkohësisht që do të respektohet do të zbatohet e nuk do të shkelet se aktualisht po shkelet për ditë. Pra këto janë tri të cilat unë besoj që janë të domosdoshme për të vazhduar ecjen përpara.
RTK: Dhe menjëherë vjen një kusht nga ndërmjetësuesit, por edhe nga Shtetet e Bashkuara të Amerikës për të cilin ju vazhdoni të jeni me të njëjtin mendim që draftstatutin e Asociacionit të Lajçakut të BE-së nuk do ta dërgoni në Gjykatën Kushtetuese sepse keni thënë që është dokument ndërkombëtar dhe duhet të shkojë në Komisionin e Venecias. Pra, vazhdoni t’i qëndroni pas asaj që ju nuk do të dërgoni drafstatutin?
Kurti: Unë kam ofruar ta shkruaj draftstatutin në Ohër. Më thanë jo thanë duhet ta shkruaj ajo Danjela Vujiiq. Në fund e shkroi Lajçaku. Po sa e shkruan Lajçaku e kisha shkruar unë. Pse mua më thanë jo. Mua është dashur të më thonë shkruaje ti draftstatutin. Unë u ofrova , më thanë jo. Danjela Vujiçiq e solli një draftstatut i cili ishte 2. 0 Republika Serbska, bile ma keq dhe në fund Lajçaku i cili më thoshte mua ti nuk bënë ta shkruash draftstatutin, e shkroi ai vet. Tëani kemi njëfarë situate paradoksale. Lajçaku mua më ka dërguar shumë letra me nënshkrim. Njëra prej tyre është pa nënshkrim, është ky draftstatuti. Është non paper. Nga pikëpamja normale, ai draft e ka statusin e non-paperit. Dhe tash unë nuk mundem me e qua atë në Gjykatën Kushtetuese. Unë besoj që zgjidhja më e mirë për këtë çështje është përbrenda infrastrukturës ligjore dhe Kushtetutës së Kosovës. Neni 44 i Kushtetutës për lirinë e asocimit edhe Ligji për Vetëqeverisjen Lokale, neni 31 dhe 32 qysh komunat munden me bashkëpunua. Tash Asociacion do të thotë e drejtë. Nuk mund të imponosh Asociacion. Asociacioni është asocim i disa komunave. Do të vi prej poshtë lartë si demokracia, e jo prej lart poshtë si diktatura. Tash nëse unë jam kryeministër demokrat, do të duhej këtyre komunave nëse kanë interes t’ju ndihmojë nëse duan të asociohen me njëra. tjetrën për ndonjë çështje të caktuar, Por kjo duhet të jetë përbrenda nenit 44 të Kushtetutës dhe Ligjit për Vetëqeverisje Lokale që i kemi ne. Unë kam qenë shumë kritik edhe jam për shumë dispozita të Kushtetueses sonë. Po për atë çfarë po duan të bëjnë në Kosovë, unë besoj që kjo Kushtetutë është mjaftueshme. Nuk është në rregull të shfaqet ky mosbesim edhe nga partnerët ndërkombëtarë në Kushtetutën e Ahtisarit sepse nëse ata thonë që duhet diçka përtej, ata pos shkojnë kundër Ahtisarit. Pse pikënisje Lajçaku për komuna të Kosovës, pse mos të jenë komunat e Kosovës. Unë jam ofruar që ta shkruaj draftin si kryeministër. Unë udhëheq dialogun edhe mund ta shkruaj draftin. Më thanë jo. Oferta ime u refuzua. Edhe kur thash po e nënshkruajmë paketën bashkë ai ka qenë koncesion. Edhe koncesioni mu refuzua, oferta mu refuzua. Unë do të vazhdojë jetën, duhet të punojë tash në veri e në jug.
RTK: Ka ndërrim të administratës amerikane kryeministër. Tash është administrata Trump. Richard Grenell është përmendur si i dërguar për misione të veçanta. Çfarë do të thotë kjo për ju?
Kurti : Ne do të bashkëpunojmë me Shtete e Bashkuara të Amerikës që i kemi aleatë, partnerë e miq të pazëvendësueshëm në aspektin e diplomacisë, të zhvillimit të demokracisë, e mbrojtjes. Presidenti Trump njihet shumë që i bie fort atij kriterit të Uellsit të samitit të NATO-s të vitit 2014 dy për qind të bruto produktit vendor. Madje tash po thuhet që nuk mjafton. Qysh nga viti 2023 edhe në vitin 2024, po e po në vitin 2025 ne do ta kalojmë dy përqindëshin e bruto produktit vendor për mbrojtjen e për ushtrinë tonë, prandaj edhe kemi përparësi. Ndërkaq në anën tjetër, ne jemi edhe duke blerë armatim nga Shtet e Bashkuara të Amerikës. Unë nuk besoj që kjo do të ndryshojë. Unë nuk besoj që SHBA-ja do të thonë që po e ndërpresim këtë shitje të armatimit ndaj Kosovës. Shtete e Bashkuara të Amerikës na njohin neve si shtet sovran edhe të pavarur. Edhe kur ka qenë president herën e parë presidenti Trump, ai është i pari që e ka përmendur nëse nuk gabojë njohjen e ndërsjellët në letrën e urimit për krerët e atëhershëm shtetëror të Vitit të Ri 2019.
RTK: Fjalimi i presidentes zoti kryeministër nuk kam parë që e keni komentuar diku dhe e kisha pyetje, sepse na bëri shumë përshtypje kur tha është luajtur bixhoz me aleancat. Kogja deklaratë në një fjalim vjetor. Si e komentoni këtë?
Kurti: Nuk e di a e ka pasur për mua konkretisht se nuk ma përmendi emrin aty, po unë bixhoz nuk kam luajtur asnjëherë në jetë.Uunë mbrojë qind për qind interesat e Republikës së Kosovës edhe gjatë këtij mandati jam koordinuar me Presidenten e Republikës për hapa të cilët i kemi ndërmarrë. Githçka ka shkuar në mënyrë të bashkërenduar.
RTK: Pra nuk e merrni që mund të ketë folur për qeverisjen tuaj edhe pse keni qenë bashkë në politikë të jashtme sidomos?
Kurti: Nuk mendoj, në politikë të jashtme i kemi koordinuar me presidenten Osamani, me kryeparlamentarin Konjufca dhe ministren e punëve të jashtme. Atë ditë me të thënë të drejtën ne e kemi pas preokupim kryesor buxhetin, katër buxhete i kemi kaluar para vitit të ri, qeveria e parë që e qon mandatin deri në fund, siguron stabilitet institucional edhe çdo herë në mbledhje të qeverisë në tetor kalohet buxheti ndërkaq në nëntor eventualisht në dhjetor ka ndodhur në vitin e kaluar po ashtu votohet në lexim të dytë,.Unë jam shumë i lumtur për këtë lloj parashikueshmërie që e ka krijuar qeveria jonë. E parashikueshmëria është e kundërta e bixhozit.
Kurti: E kam menduar vizitën në Hagë dhe kamë qenë i interesuar të shkojë …
RTK: Edhe një seancë ka qenë interesantë kjo me Shqipërinë, më një fjalim të kryeministrit Rama, e përmendi aty Gjykatën Speciale. Çfarë ju thotë kjo kur e përmendi Gjykatën Speciale? Kryeministër do të ishte pyetja imë, unë e di që ju nuk e keni votuar edhe keni qenë kundër Gjykatës Speciale, edhe ata që e kanë votuar po thonë që nuk e kanë paraparë të tillë, mund të ketë ndryshuar misioni. Po si i shihni zhvillimet në Gjykatën Speciale edhe pse nuk keni shkuar për vizitë, ju keni atje edhe një bashkë partiak të tuajin pavarësisht ndasive politike a e keni menduar vizitën në Hagë?
Kurti: Unë e kam menduar vizitën në Hagë dhe kamë qenë i interesuar të shkojë, por faktori kryesor që më ka ndalur të shkojë është fakti që duhej plotësuar shumë dokumente, formularë ku t’i nënshkruaj në dokumentet e Gjykatës Speciale. Unë nuk kam dashur ta bëjë atë gjë, unë kam konsideruar e edhe sot mendoj që është gabim ajo. Dhe tre gushti i vitit 2015 ësh tëditë e zezë në historinë e re të Kosovës. Gjykata Speciale apo Dhomat e Veçanta të Specializuara si quhen ndryshe nuk kamë parë që kanë transparencë, në një farë mënyre e kanë një këmbë brenda Kosovës e një këmbë jashtë prej Kosovës, koka nuk e di tamam ku është, por ndodhemi në këtë situatë ku jemi, ajo çfarë kemi bërë ne është nuk kemi shkuar përtej vullnetit të të pandehurve atje. Ata janë aktiv në procesin gjyqësorë ne i mbështesim mbrojtjet e tyre.70 milionë euro qeveria jonë i ka dhënë gjatë këtyre katër viteve për mbrojtjen e luftëtarëve ë UÇK-së që po gjykohen në Hagë ku unë kamë shumë kritika e vërejtje. Do të kisha preferuar nëse do t’i mbronte vetëm një ekip i përbashkët të gjithë, jo të ishin avokatët e ndarë se unë vetë kamë qenë nëpër procese, jo vetëm të Serbisë po edhe te EULEX-it e të UNMIK-ut e të Kosovës. Unë nuk kam marrë avokat kurrë, mua edhe pasi kam dal prej burgut më kanë arrestuar nja dhjetë herë po avokatë nuk kam marrë asnjëherë. Unë kisha preferuar nëse të gjithë këta do të mbroheshin bashkë, por dukët që nuk është e mundur, se qysh në fillim u krijuan edhe fonde të veçanta individuale për t’u mbrojtut. tash unë nuk mund të përzihem aty. Ata i marrin ato vendime, prej neve kanë kërkuar mbështetje edhe mbështetje është substanciale, 70 milionë euro për katër vjet.
