Këshilli i Sigurisë së Kosovës mbajti sot një mbledhje të jashtëzakonshme me kërkesë të Kryeministrit, Albin Kurti, ku u diskutua për situatën aktuale të sigurisë në vend, duke përfshirë veprimet destabilizuese të Serbisë dhe përpjekjet për pengimin e formimit të institucioneve të reja.
Në takim u theksua se Serbia ka ndërhyrë në mënyrë të drejtpërdrejtë për të minuar stabilitetin e Kosovës. U raportua për sulmin ndaj Zyrës së Postës së Kosovës në Zveçan më 1 prill, ku dy granata dore u hodhën në drejtim të zyrës, njëra prej të cilave shpërtheu. Pavarësisht dëmeve, zyra është riparuar dhe shërbimet janë rikthyer në normalitet.
Po ashtu, u diskutua për arrestimin e katër serbëve në Gjakovë, përfshirë një oficer të policisë dhe një kapiten të ushtrisë serbe, të cilëve u konfiskuan armë dhe material tjetër komprometues. Këshilli i Sigurisë theksoi nevojën për vëmendje të shtuar dhe gatishmëri nga institucionet e Kosovës për të përballuar këto kërcënime.
Përveç ndikimeve të Serbisë në fushatën zgjedhore dhe procesin zgjedhor të 9 shkurtit 2025, ku u raportua për ndërhyrje të Listës Serbe dhe Millan Radoiçiq, Këshilli i Sigurisë theksoi se Serbia po orvatet të ndërhyjë edhe te deputetët e komunitetit joshumicë e joserbë, për të penguar krijimin e institucioneve të reja. Përdorimi i kërcënimeve, joshjeve dhe shantazheve synon të nxisë tensione dhe destabilizim në Kosovë.
- Advertisement -
Ky veprim i Serbisë është konsideruar një ndërhyrje flagrante në sovranitetin dhe integritetin institucional të Kosovës, duke synuar të dëmtojë funksionimin demokratik të vendit. Njëkohësisht, Serbia po ushtron trysni ndaj serbëve të Kosovës për pjesëmarrje në një tubim të paralajmëruar të presidentit të Serbisë, Aleksandar Vuçiq, në Beograd, që pritet të mbahet javën e ardhshme. Regjimi i Vuçiqit është akuzuar për përpjekje për eksportimin e krizës në Kosovë, në një kohë kur vetë ai është në krizën më të madhe politike dhe ekonomike në Serbi.
Ky zhvillim është një tjetër hap i përpjekjeve të Serbisë për të destabilizuar Kosovën dhe për të minuar progresin e saj politik dhe institucional.
