Ministria e Punëve të Jashtme dhe Diasporës ka njoftuar se Qeveria e Malajzisë ka marrë vendim për të lehtësuar regjimin e vizave për qytetarët e Republikës së Kosovës. Sipas këtij vendimi, qytetarët kosovarë do të mund të udhëtojnë pa vizë drejt Malajzisë për qëndrime afatshkurtra, me një afat maksimal prej 30 ditësh.
Lajmin e ka konfirmuar edhe Zëvendëskryeministrja dhe Ministrja në detyrë e Punëve të Jashtme dhe Diasporës, Donika Gërvalla, e cila e ka mirëpritur këtë vendim, duke e cilësuar si një hap pozitiv në drejtim të forcimit të lidhjeve bilaterale ndërmjet dy vendeve.
“Republika e Kosovës mirëpret këtë hap pozitiv dhe shpreh mirënjohjen ndaj institucioneve malajziane për bashkëpunimin dhe mbështetjen e vazhdueshme në shërbim të qytetarëve dhe lidhjeve bilaterale gjithnjë e më të fuqishme mes dy vendeve tona,” thuhet në reagimin zyrtar të ministres Gërvalla.
Ky zhvillim vjen si pjesë e përpjekjeve të vazhdueshme të diplomacisë kosovare për të avancuar lirinë e lëvizjes së qytetarëve dhe për të thelluar marrëdhëniet me vendet e Azisë Juglindore.
