Për të tretën herë që nga viti 2021, Kosova do të jetë mirëpresë stërvitjen ushtarake ndërkombëtare më të madhe të drejtuar nga Ushtria e Shteteve të Bashkuara për Evropë dhe Afrikë – “Defender Europe 2025”.
Përmes këtij ushtrimi, Forca e Sigurisë së Kosovës do të demonstrojë gatishmërinë operacionale dhe aftësinë për ndërveprim ushtarak me forcat partnere të rajonit, përfshirë SHBA-në, Shqipërinë, Kroacinë, Maqedoninë e Veriut dhe Bullgarinë.
Stërvitja, e cila zhvillohet nën udhëheqjen e Komandës së Ushtrisë Amerikane për Evropë dhe Afrikë, do të përfshijë rreth 25 mijë trupa nga 29 shtete anëtare dhe partnere të NATO-s, duke e bërë atë operacionin më të madh shumëkombësh të këtij lloji të drejtuar nga SHBA.
Nga sot e deri më 9 qershor, në kuadër të realizimit të “Defender Europe 25”, do të ketë lëvizje të konvojeve ushtarake nga bazat e FSK-së drejt rajonit të Gjakovës, konkretisht në Aeroportin e Gjakovës dhe në poligonin ushtarak në Babaj të Bokës.
- Advertisement -
Ministria e Mbrojtjes bën thirrje për mirëkuptim nga qytetarët gjatë kësaj periudhe, për shkak të intensifikimit të aktiviteteve ushtarake në terren.
