Kryetari i Kuvendit të Kosovës, Glauk Konjufca gjatë një takimi që zhvilloi me një delegacion të deputetëve nga Grupi i Miqësisë i Kuvendit të Maqedonisë së Veriut, të kryesuar nga kryetari Afrim Gashi, tha se bashkëpunimi i ngushtë në mes të dyja shteteve, Republikës së Kosovës dhe Maqedonisë së Veriut, i kontribuon zhvillimit të gjithëmbarshëm dhe stabilitetit rajonal.
Konjufca i shoqëruar nga deputetët Ganimete Musliu dhe Avni Dehari, diskutuan me ligjvënësit e Maqedonisë së Veriut për aktualitetin politik, zhvillimet rajonale, mbështetjen e ndërsjellë në rrugën e integrimit evropian dhe euroatlantik, si dhe për mundësitë e zgjerimit dhe forcimit të bashkëpunimit ndërparlamentar përmes grupeve të miqësisë.
Kryeparlamentari Konjufca i vlerësoi shumë të mira marrëdhëniet e deritashme dypalëshe, duke thënë se popujt tanë kanë lidhje historike “dhe ne duhet t’i kultivojmë edhe më shumë këto lidhje”.
Ai po ashtu kërkoi mbështetjen e Maqedonisë së Veriut për proceset nëpër të cilat i ka përpara Kosova.
- Advertisement -
Ndërsa, Afrim Gashi, kryetar i Grupit të Miqësisë nga Maqedonia e Veriut, e falënderoi kryetarin Konjufca për pritjen dhe theksoi se takimet e tilla i shërbejnë fuqizimit të raporteve të ndërsjella, që janë të shkëlqyera, dhe se ka shumë fusha bashkëpunimi me interes për qytetarët dhe të shtetet tona në të cilat do të punojmë.
Në takim, u ritheksua gatishmëria për thellimin e bashkëpunimit dhe intensifikimin e marrëdhënieve dypalëshe ndërmjet Republikës së Kosovës dhe Republikës së Maqedonisë së Veriut.
