Për dekada të tëra, paraliza nga dëmtimet e palcës kurrizore është konsideruar si një gjendje e pakthyeshme, dhe ndërfaqet më të avancuara tru-kompjuter, si ato të zhvilluara nga Neuralink i Elon Musk, janë bazuar në idenë se rikuperimi i gjymtyrëve të paralizuara është i pamundur. Megjithatë, një studim i fundit në Kinë ka sfiduar këtë bindje dhe ka sjellë një zhvillim të ri revolucionar.
Studiuesit e Universitetit Fudan në Shangai kanë arritur një avancim të jashtëzakonshëm, duke rikthyer aftësinë për të lëvizur te katër pacientë të paralizuar, vetëm disa orë pas një operacioni minimalisht invaziv. Gjatë këtij eksperimentimi, ata kanë implantuar çipa elektrosh në tru dhe në palcën kurrizore për të rinisur komunikimin e dëmtuar mes këtyre dy organeve. Për vetëm 24 orë, pacientët arritën të kontrollonin këmbët, dhe disa javë më vonë ata mund të ecnin të pavarur. Disa pacientë gjithashtu raportuan rikthimin e ndjeshmërisë nervore.
Ndërfaqja tru-shpinë e zhvilluar në Kinë është ndryshe nga ato tradicionale që përdorin pajisje të jashtme për të kontrolluar lëvizjet. Ky sistem funksionon duke stimuluar drejtpërdrejt nervat që janë fjetur pas paralizës, duke mundësuar rimodelimin e sistemit nervor dhe duke eliminuar nevojën për pajisje mbështetëse. Studiuesi kryesor, Jia Fumin, nga Instituti i Shkencës dhe Teknologjisë së Inteligjencës së Ngjashme me Trurin në Fudan, e cilësoi këtë zhvillim si një hap të madh në neuroteknologji, duke theksuar rëndësinë e këtij progresi për zhvillimin e teknologjisë vendase kineze.
Çipat, të cilët janë të vegjël rreth 1 mm në diametër, janë implantuar në korteksin motorik të trurit, ku ata mbledhin dhe deshifrojnë sinjalet nervore, pastaj dërgojnë stimuj elektrike drejt palcës kurrizore, duke krijuar një lidhje të drejtpërdrejtë mes trurit dhe muskujve të paralizuar.
- Advertisement -
Në rastin e parë, një pacient 34-vjeçar që kishte mbetur i paralizuar pas një aksidenti, arriti të lëvizte këmbët brenda 24 orëve pas operacionit dhe pas dy javësh mund të ecte mbi pengesa. Pacientët e tjerë që iu nënshtruan operacioneve gjithashtu përjetuan rikuperim të shpejtë dhe përmirësim të funksioneve të trupit.
Krahasuar me studimet e mëparshme në Zvicër, që treguan përmirësime pas 6 muajsh, metoda kineze ka ndihmuar pacientët të rikuperohen brenda dy javësh, duke e bërë këtë proces më efikas dhe me më pak dëmtime kirurgjikale.
Kjo arritje shënon një moment të rëndësishëm për neuroteknologjinë në Kinë, duke krijuar mundësi të reja për trajtimin e më shumë se 3.7 milionë pacientëve me dëmtime të palcës kurrizore në këtë vend, dhe potencialisht mund të çlirojë pacientët nga varësia ndaj pajisjeve gjatë gjithë jetës. Jia Fumin theksoi se nëse kjo ndërhyrje kombinohet me rehabilitim intensiv për disa vite, nervat e pacientëve mund të rilidhen dhe të rikuperojnë funksionin e tyre plotësisht.
IE
