Këshilli i Marrëdhënieve Shqiptaro-Amerikane (AARC) ka reaguar ndaj tarifave të reja të vendosura nga Shtetet e Bashkuara për importet globale dhe ka bërë thirrje për veprim të menjëhershëm nga qeveritë e Kosovës, Shqipërisë, Malit të Zi dhe Maqedonisë së Veriut. AARC kërkon që këto shtete të pezullojnë tarifat ndaj mallrave amerikane, të vendosura nga SHBA.
Aktualisht, Shtetet e Bashkuara kanë vendosur një tarifë 10% për Shqipërinë, Kosovën dhe Malin e Zi, ndërsa Maqedonia e Veriut përballet me një tarifë ndëshkuese prej 33%. Në një deklaratë të saj, AARC përshëndeti veprimin e Presidentes së Kosovës, Vjosa Osmani, e cila ka propozuar pezullimin e tarifave, duke e vlerësuar këtë si një hap të mençur dhe strategjik për forcimin e marrëdhënieve me SHBA-në. “E përgëzojmë Presidenten Osmani për lidershipin e saj dhe i bëjmë thirrje Qeverisë së Kosovës të veprojë pa vonesa për të miratuar dhe zbatuar këtë politikë,” thuhet në reagimin e AARC.
Po ashtu, AARC kërkon që Shqipëria, Mali i Zi dhe Maqedonia e Veriut të ndjekin shembullin e Kosovës dhe të heqin tarifat për importet nga SHBA. Ajo thekson se një veprim i përbashkët do të forconte angazhimin e rajonit për bashkëpunim ekonomik dhe do të dërgonte një mesazh të qartë për SHBA-në dhe BE-në në lidhje me gatishmërinë e rajonit për veprim të koordinuar dhe konstruktiv.
Për më tepër, AARC sugjeron që këto katër shtete të punojnë së bashku për të hartuar një propozim të përbashkët për Shtetet e Bashkuara, i cili do të krijonte një mjedis ekonomik më të integruar dhe tërheqës për investitorët amerikanë. Sipas deklaratës, një front i përbashkët do të rrisë potencialin ekonomik të rajonit, do të tërheqë kapitale të reja dhe do të forcojë marrëdhëniet afatgjata me tregun amerikan.
- Advertisement -
AARC thekson gjithashtu se ky veprim do të tregonte përkushtimin e vendeve të rajonit ndaj vlerave të përbashkëta si tregtia e lirë, tregjet e hapura dhe aleancat strategjike, që janë thelbësore për partneritetin me SHBA-në dhe për aspiratat për integrim në BE.
Në përmbyllje, AARC ka bërë një thirrje urgjente për veprim konkret dhe të bashkërenduar: “I nxisim politikëbërësit në Kosovë, Shqipëri, Mal të Zi dhe Maqedoni të Veriut të shfrytëzojnë këtë mundësi historike për të treguar përkushtim ndaj aleancës me SHBA-në, të forcojnë marrëdhëniet ekonomike dhe të kontribuojnë për stabilitet dhe zhvillim rajonal.” AARC ka shprehur gjithashtu gatishmërinë për të mbështetur çdo iniciativë që nxit prosperitetin ekonomik dhe marrëdhëniet e qëndrueshme ndërmjet Ballkanit Perëndimor dhe Shteteve të Bashkuara.
