Kompania Kosovare për Furnizim me Energji Elektrike (KESCO) ka thënë se nuk ka pasur rritje të tarifave fundore.
Nëpërmjet një komunikate për media, kjo kompani ka sqaruar se tarifat e energjisë elektrike janë rishikuar dhe rritur afërsisht 15% krahasuar me tarifat 2022-2023, me vendim të ZRrE-së, më 1 prill 2023.
“Rritja e vlerës se faturave në këtë muaj dimri është rezultat i rritjes së konsumit të energjisë elektrike, veçanërisht te konsumatorët që e përdorin energjinë elektrikë për ngrohje. Konsumi i energjisë elektrike në vlerë më shumë se 800 kWh në muaj, faturohet me tarifë më të lartë, ashtu siç paraqiten në çdo faturë të konsumatorëve”, thuhet në njoftim.
Efekti tjetër i rritjes së vlerës së faturës, sipas KESCO, është se vitin e kaluar në të njëjtën periudhë, Qeveria e Kosovës ka subvencionuar konsumatorët që kanë kursyer energji elektrike.
- Advertisement -
“Disa konsumatorë po marrin fatura më të larta sepse po përdorin masivisht energjinë elektrike për ngrohje”, thotë KESCO në reagim. Kjo e fundit, thotë se është e përkushtuar në vazhdimësi që të bëjë thirrje për kursim dhe shfrytëzim efikas të energjisë elektrike, “duke ndarë këshilla praktike për secilën kategori të konsumatorëve, pikërisht për të mbrojtur konsumatorin dhe sistemin elektrik nga këto ngarkesa”.
Sipas KESCO, ZRrE ka ndërtuar një strukturë tarifore të ndarë në blloqe shpenzuese.
“Kështu, nëse ju si konsumatorë familjarë konsumoni deri në 800 kWh, atëherë i nënshtroheni vetëm dy blloqeve, ditën dhe natën, të cilat në dimër fillojnë nga ora 22:00 deri në orën 7:00. Gjatë ditës çmimi është 7.79 cent për kWh, ndërsa natën rreth 57 për qind më i lirë, pasi llogaritet me 3.34 cent për kWh. Të gjitha këto çmime janë të shënuara në çdo faturë për konsumatorët”, sqaron KESCO.
