Bashkimi Evropian po analizon gabimet në dialogun e Brukselit mes Kosovës dhe Serbisë për të nxjerrë në pah aspekte që mund të japin impuls në procesin e normalizimit të marrëdhënieve mes dy vendeve, tha shefja e politikës së jashtme të BE-së, Kaja Kallas, gjatë një konference për media në Podgoricë.
Kallas theksoi se në këtë muaj, Bashkimi Evropian është duke analizuar situatën së bashku me të dërguarin e BE-së për dialogun, Peter Sorensen, i cili mori detyrën në shkurt. Ajo shpjegoi se “çfarë është më e rëndësishme për ne është normalizimi i marrëdhënieve, sepse pa të, asnjëra nga palët nuk mund të ecë përpara në rrugën drejt BE-së.”
Pavarësisht nënshkrimit të marrëveshjeve në kuadër të dialogut dhe zhvillimit të tij gjatë viteve, procesi ka hasur në ngecje dhe tensionet mes Kosovës dhe Serbisë janë rritur. Kallas nuk dha detaje të mëtejshme mbi gabimet specifike që mund të kenë ndodhur gjatë këtij procesi, por theksoi se një nga objektivat kryesore është normalizimi i marrëdhënieve.
Në vitin 2023, nën ndërmjetësimin e Bashkimit Evropian, Kosova dhe Serbia arritën një marrëveshje për rrugën drejt normalizimit të marrëdhënieve, por dy vendet janë kritikuar për moszbatimin e marrëveshjes, e cila është e detyrueshme për to.
- Advertisement -
Vizita e Kallas në Podgoricë është pjesë e turit të saj të parë në rajonin e Ballkanit Perëndimor si shefe e diplomacisë evropiane. Pas Podgoricës, ajo do të vizitojë Shqipërinë dhe Bosnje e Hercegovinën nga 7 deri më 9 prill. Nuk është paralajmëruar vizitë në Kosovë dhe Serbi.
