Ish-deputeti i Kuvendit të Kosovës, Gramos Agusholli, është ndaluar nga autoritetet serbe në pikën kufitare në Merdar, teksa po udhëtonte nëpër Serbi drejt Sllovenisë përmes një rruge tranziti.
Lajmin e ka konfirmuar Ministria e Punëve të Jashtme dhe Diasporës (MPJD), e cila ka reaguar ashpër ndaj këtij veprimi, duke e cilësuar ndalimin si të papranueshëm dhe arbitrar.
Sipas njoftimit të MPJD-së, Zyra Ndërlidhëse e Republikës së Kosovës në Serbi ka informuar menjëherë misionet diplomatike të vendeve të KUINT-it dhe Zyrën e BE-së në Beograd. Po ashtu, MPJD ka njoftuar edhe përfaqësuesit diplomatikë të shteteve të KUINT-it dhe Zyrën e BE-së në Kosovë, duke theksuar se janë ndërmarrë hapat e nevojshëm për sigurimin e informacioneve zyrtare dhe të plota rreth rastit.
Në reagimin zyrtar, MPJD ka dënuar ndalimin e Agushollit, duke e konsideruar si një praktikë represive që shkel parimet e së drejtës ndërkombëtare dhe konventat për të drejtat e njeriut.
- Advertisement -
“MPJD i bën thirrje Bashkësisë Ndërkombëtare të reagojë urgjentisht, duke kërkuar lirimin e menjëhershëm të z. Gramos Agusholli dhe ndalimin e menjëhershëm të praktikave të tilla represive nga ana e autoriteteve serbe”, thuhet në reagim.
