Kanë vazhduar edhe sot urimet në 17 vjetorin e pavarësisë së Kosovës. Presidentja, Vjosa Osmani, ka pranuar urime nga Guvernatorja e Përgjithshme e Kanadasë, Mary May Simon .
Guvernatorja kanadeze ka theksuar lidhjet e ngushta ndërmjet të dyja vendeve, të cilat, sipas presidencës, bazohen në vlerat dhe qëllimet e përbashkëta, përfshirë angazhimin për paqe, stabilitet rajonal dhe demokraci.
Ajo ka ritheksuar mbështetjen e palëkundur të Kanadasë për rrugën evropiane dhe transatlantike të Kosovës dhe ka vlerësuar përparimin e bërë në këtë drejtim.
Sipas Guvernatores së Përgjithshme, mërgata kosovare në Kanada përfaqëson një komunitet të gjallë dhe të angazhuar që kontribuon ndjeshëm në shoqërinë kanadeze përmes trashëgimisë kulturore, angazhimit akademik dhe pjesëmarrjes në jetën sociale dhe ekonomike.
- Advertisement -
Në përfundim të urimit, të shpërndarë për media nga presidenca, guvernatorja nga Kanadaja ka shprehur dëshirën për të vazhduar forcimin e lidhjeve dypalëshe dhe bashkëpunimit në forume ndërkombëtare.
