Ambasadori i Francës në Kosovë, Olivier Guerot, ka deklaruar se Asociacioni i komunave me shumicë serbe nuk përbën një strukturë të ngjashme me Republikën Serbe në Bosnje dhe Hercegovinë.
Në një konferencë të organizuar nga Lëvizja FOL dhe Instituti i Prishtinës për Studime Politike, me temën “Kosova drejt Bashkimit Evropian: Rruga drejt një zgjidhjeje”, Guerot theksoi se Asociacioni nuk do të ketë kompetenca legjislative dhe do të funksionojë në përputhje me Kushtetutën e Kosovës, jo si pjesë e saj apo si një ent autonom.
“Asociacioni nuk është një republikë serbe. Ai nuk do të ketë funksion legjislativ dhe do të jetë nën Kushtetutën e Kosovës,” u shpreh ambasadori francez.
Guerot gjithashtu nënvizoi se një hap i mundshëm i Qeverisë së Kosovës për ta dërguar draftin e Asociacionit në Gjykatën Kushtetuese do të kishte ndikim të konsiderueshëm pozitiv në perceptimin ndërkombëtar, përfshirë edhe në Francë.
- Advertisement -
“Nëse Kosova vendos ta dërgojë draftin në Gjykatën Kushtetuese, kjo do të ndryshonte shumë atmosferën në Paris,” tha ai.
Deklaratat e ambasadorit vijnë në një kohë kur çështja e Asociacionit mbetet një prej temave më të debatueshme në dialogun Kosovë–Serbi dhe në procesin e integrimit evropian të vendit.
