Grupi për Studime Juridike dhe Politike (GLPS) ka publikuar një analizë kritike lidhur me vendimet e marra nga Qeveria Kurti 2 pas zgjedhjeve të 9 shkurtit 2025. Sipas këtij raporti, një numër i konsiderueshëm vendimesh të marra nga kabineti në largim bien ndesh me Ligjin për Qeverinë dhe Kushtetutën e Kosovës.
GLPS thekson se gjatë periudhës 9 shkurt – 27 mars, qeveria ka miratuar 76 vendime, prej të cilave 13 tejkalojnë kompetencat që një qeveri në detyrë ligjërisht mund të ushtrojë. Vendimet përfshijnë emërime në pozita publike si dhe miratimin e dokumenteve strategjike, të cilat, sipas GLPS, nuk mund të ndërmerren pa legjitimitet të plotë.
Në analizën e publikuar, GLPS ka kritikuar edhe faktin se pas certifikimit të rezultateve nga Komisioni Qendror i Zgjedhjeve (KQZ) më 27 mars, disa zyrtarë qeveritarë të certifikuar si deputetë kanë vazhduar të marrin pjesë në mbledhjet e Qeverisë. Kjo, sipas organizatës, përbën shkelje të nenit 72 të Kushtetutës së Kosovës, i cili ndalon njëkohësisht ushtrimin e funksioneve ekzekutive dhe legjislative.
GLPS evidenton se në tri mbledhjet e pas certifikimit janë marrë 17 vendime, ku kanë marrë pjesë ministra dhe kryeministri në kundërshtim me Kushtetutën. Organizata e konsideron të gjithë këto vendime si të pavlefshme nga pikëpamja ligjore.
- Advertisement -
Si shembuj konkretë të vendimmarrjes së kontestuar, GLPS përmend miratimin e dokumenteve strategjike si: Plani i Veprimit për Ndërhyrjen në Fëmijërinë e Hershme 2025–2030, koncept-dokumenti për shëndetin e bimëve, si dhe ai për bujqësinë organike.
GLPS i bën thirrje institucioneve që të respektojnë kufizimet e përcaktuara për një qeveri në largim dhe thekson se çdo vendim i ardhshëm duhet të merret nga një përbërje legjitime ekzekutive që i përmbahet dispozitave kushtetuese dhe ligjore në fuqi.
