Institucionet e Kosovës planifikojnë të ushtrojnë padi për gjenocid kundër Serbisë. Këtë e paralajmëroi së fundmi edhe kryekuvendari Glauk Konjufca. Juristët thonë se Kosova duhet të përgatitet fort për ngritjen e padisë dhe argumentimin e gjenocidit që Serbia shkaktoi gjatë luftës së fundit në Kosovë.
Për më shumë se 13 mijë e 500 personat e vrarë gjatë luftës së fundit në Kosovë, të zhdukurit, mijëra gra e burra të dhunuar dhe qindra masakra të tmerrshme të shkarkuara gjatë luftës së fundit në vend, Kosova planifikon ta padisë Serbinë për gjenocid.
Akademik Arsim Bajrami, thotë se Kosova duhet të përgatitet mirë dhe sa më parë të padisë Serbinë për gjenocid. Gjatë promovimit të librit të tij “Gjenocidi i Serbisë në Kosovë aspekte juridike”, Bajrami tha se shumica nga pesë kriteret për përcaktimin e gjenocidit janë të plotësuara në Kosovë.
“Për tre kriteret e parapara për përcaktimin e gjenocidit ne kemi prova të plota. E mira është se nuk kërkohet plotësimi i pesë kritereve në mënyrë kumulative, por cilido prej kritereve që plotësohet ai është gjenocid. Për ekzistencën e gjenocidit nuk është faktor determinant numri i të vrarëve, a janë vrarë 13 mijë, një milion njerëz apo sa. Esenciale në kuptimin e konventës është se a ka ekzistuar një plan për gjenocid, dhe në rastin e Kosovës, Serbia ka pasur plan konkret për ushtrimin e gjenocidit”, tha ai.
- Advertisement -
E sipas zyrtarit nga Instituti i Kosovës për Drejtësi, Gzim Shala, Kosova nuk mund të ushtrojë një padi eventuale për gjenocid kundër Serbisë, meqë nuk është anëtare e Organizatës së Kombeve të Bashkuara. Ai tha për Radio Kosovën që edhe nëse padia bëhet nëpërmjet një shteti të tretë, Kosova duhet të përgatitet fort ta fitojë rastin.
“Para se të futemi te meritat e çështjes, nëse kjo lëndë do të arrihet të argumentohet mjaftueshëm në gjykatë ose jo, duhet të shqyrtohet pranueshmëria e rastit në mënyrë që kjo padi mos të hidhet si e palejuar dhe në një far mënyre Kosova të dalë shtet jo serioz para institucioneve ndërkombëtare. Në çdo rast, Kosova duhet që të ketë një mbrojtje shumë të mirë, për shkak se në aspektin politik, pa marrë parasysh vendimin përfundimtar, mund të ketë edhe pasojat e saj negative”, tha Shala.
Padia për gjenocid kundër Serbisë ishte premtim elektoral i Lëvizjes Vetëvendosje në zgjedhjet e fundit.
Krerët e shtetit mjaft shpesh e kanë përmendur mundësinë e ngritjes së padisë për gjenocid. Këtë e paralajmëroi dje e sot edhe kryeparlamentari Glauk Konjufca, i cili tha se Kosova prej dy vitesh po punon për ngritjen e padisë për gjenocidin që ka shkaktuar Serbia në Kosovë.
