Për herë të 18-të ka dështuar përpjekja për konstituimin e legjislaturës së nëntë të Kuvendit të Kosovës. Gjatë seancës së djeshme, kryesuesi Avni Dehari ftoi përfaqësuesit e grupeve parlamentare në një konsultim të shkurtër për të tentuar të arrihej një marrëveshje, por qëndrimet e partive mbetën të pandryshuara.
Si pasojë, nuk u arrit të formohej Komisioni për votim të fshehtë, një hap kyç për zgjedhjen e kryeparlamentarit. Propozimi mori vetëm 52 vota për, një kundër dhe asnjë abstenim, ndërkohë që 106 deputetë ishin të pranishëm në sallë.
Kryesuesi Dehari njoftoi se seanca e radhës do të mbahet të mërkurën në orën 11:00, duke lënë hapur mundësinë për një tjetër përpjekje për të kaluar në fazën tjetër të procesit të konstituimit.
