Në mbrëmjen e 1 prillit, Muhamed Lika, pjesëtar i Policisë së Kosovës, humbi jetën në hyrje të banesës së tij në Kaçanik. Deri tani, autorët e vrasjes ende nuk janë kapur.
Zëdhënësi i Policisë për rajonin e Ferizajt, Kanun Veseli, e konfirmoi këtë informacion në media, duke theksuar se hetimet janë duke vazhduar për kapjen e dyshuarve.
Trupi i pajetë i rreshterit Lika u varros të mërkurën në “varrezat e dëshmorëve”, ku mori nderime të larta.
Në një konferencë për media, kryeprokurori i Ferizajt, Burim Çerkini, deklaroi se vrasja mund të ketë qenë e planifikuar. Sipas tij, të dyshuarit nuk kanë përdorur maska, por kapele, dhe ngjarja ka ndodhur në errësirë, duke e vështirësuar identifikimin e autorëve.
- Advertisement -
Ai theksoi gjithashtu se nuk ka prova që tregonin se vrasja kishte për qëllim grabitjen, duke shtuar se, përkundrazi, qartë rezulton që qëllimi i autorëve ka qenë ekzekutimi i rreshterit Lika.
