Komiteti për Politikë të Jashtme i Parlamentit Evropian miraton draft-rezolutën për Kosovën, kërkohet heqja e masave të BE-së
Komiteti për Politikë të Jashtme i Parlamentit Evropian ka miratuar një draft-rezolutë për Kosovën, në të cilën kërkohet heqja e menjëhershme e masave të vendosura nga Bashkimi Evropian.
Raportuesi për Kosovën, Riho Terras, është autori i këtij dokumenti, ku theksohet se vendi i Kosovës është në BE. Ai ka përshëndetur aplikimin e Kosovës për anëtarësim në Bashkimin Evropian dhe ka ftuar shtetet anëtare që nuk e kanë njohur ende shtetin e Kosovës, të bëjnë një hap të tillë pa vonesa të mëtejshme.
Në këtë draft, Parlamenti Evropian mbështet gjithashtu kërkesën e Kosovës për anëtarësim në Këshillin e Evropës dhe integrimin e vendit në programin e Partneritetit për Paqe të NATO-s.
- Advertisement -
Dokumenti nënvizon progresin e rëndësishëm në fushat e drejtësisë, sigurisë, luftës kundër krimit të organizuar dhe zhvillimit të ekonomisë së tregut, por shpreh shqetësim për përparimin e kufizuar në forcimin e sundimit të ligjit. Po ashtu, theksohet se ka dobësi të sistemit të drejtësisë në Kosovë, veçanërisht lidhur me pavarësinë dhe respektimin e ndarjeve të pushteteve.
Një tjetër shqetësim i shprehur në këtë dokument është situata e sigurisë në veri të Kosovës, pas sulmeve të armatosura në Banjskë dhe në Ibër Lepenc, duke kërkuar që autorët e këtyre sulmeve të përballen me drejtësinë. Veçanërisht, shprehet keqardhja për faktin që Serbia nuk ka sjellë para drejtësisë kryesit e sulmeve, duke përfshirë ish-nënkryetarin e Listës Serbe, Millan Radoiçiq.
Në fund, dokumenti përshëndet përpjekjet për normalizimin e marrëdhënieve mes Kosovës dhe Serbisë dhe mbështet emërimin e Peter Sorensen si dërguar të posaçëm për këtë proces.
Pas miratimit në Komitetin për Politikë të Jashtme, draft-rezoluta do të diskutohet dhe votohet në seancën plenare të Parlamentit Evropian gjatë muajve të verës, ku do të marrë formën përfundimtare të Rezolutës.
