Sot në ora 13:00, në Presidencën e Kosovës pritet të zhvillohet një takim i rëndësishëm ndërmjet presidentes Vjosa Osmani dhe liderëve të partive parlamentare. Qëllimi i këtij takimi është gjetja e një zgjidhjeje për zhbllokimin e situatës politike të krijuar pas zgjedhjeve të 9 shkurtit.
Ftesa për këtë tryezë politike erdhi pas një kërkese nga Partia Demokratike e Kosovës (PDK), në përpjekje për të tejkaluar ngërçin institucional që ka paralizuar punën e Kuvendit, i cili ende nuk është konstituuar plotësisht.
Presidentja Osmani, në një deklaratë të mëhershme, ka bërë të ditur se do të nisë një seri takimesh me partitë politike për të kontribuar në tejkalimin e krizës që ka bllokuar zgjedhjen e kryetarit të Kuvendit.
Ndërkohë, analistët politikë e shohin këtë takim si një hap të domosdoshëm drejt dialogut dhe konsultimit ndërmjet subjekteve politike, por shprehin rezerva për ndonjë zgjidhje të shpejtë apo konkrete në këtë fazë.
