Kryesuesi i seancës konstituive të Kuvendit të Kosovës, Avni Dehari, ka njoftuar se edhe sot (e enjte) është ndërprerë për herë të dytë tentativa për konstituimin e legjislaturës së re të Kuvendit, për shkak të mungesës së konsensusit ndërmjet partive politike.
Pas një takimi konsultativ me përfaqësuesit e subjekteve parlamentare, Dehari theksoi se nuk u arrit dakordim për të vazhduar me seancën konstituive.
“U panë qëndrimet aktuale, partitë politike braktisën seancën konsultuese. Fatkeqësisht, nuk pati konsensus për të vazhduar sot,” u shpreh ai.
Në mungesë të marrëveshjes, kryesuesi njoftoi se seanca do të vazhdojë pas 48 orësh, më 19 prill në ora 12:00.
- Advertisement -
Ngërçi politik për verifikimin e mandateve të deputetëve vazhdon ta pengojë formimin e strukturave të reja të Kuvendit, duke vonuar edhe hapat e mëtejmë drejt krijimit të institucioneve të reja.
