Kosova rrezikon të futet në një ngërç institucional nëse Kuvendi i ri nuk arrin të konstituohet deri më 30 prill, paralajmëron Naim Jakaj, hulumtues i lartë në Institutin e Kosovës për Drejtësi (IKD).
Sipas Jakajt, situata aktuale rrezikon të përsërisë bllokadën e vitit 2014, kur vendi mbeti pa institucione funksionale për më shumë se gjashtë muaj.
“Pas datës 30 prill, Kosova hyn në një ngërç politik që nuk dihet se si do të përfundojë. Mosvotimi i raportit të Komisionit të përkohshëm për verifikim të kuorumit dhe mandateve e bën të pamundur betimin e deputetëve,” tha ai për KosovaPress.
Dështime të njëpasnjëshme për konstituimin e Kuvendit
- Advertisement -
Tentativa e parë për konstituimin e legjislaturës së nëntë të Kuvendit të Kosovës u bë më 15 prill, por PDK, LDK dhe AAK votuan kundër raportit të Komisionit të përkohshëm, duke bllokuar kështu procesin.
Edhe më 17 prill, në tentimin e dytë, deputetët nuk arritën të procedojnë me betimin. Kryesuesi i seancës, Avni Dehari nga LVV, e ndërpreu mbledhjen pas konsultimeve me partitë politike, duke deklaruar se “nuk pati konsensus për të vazhduar më tej”.
Sidoqoftë, Jakaj e konsideron këtë veprim të papërshtatshëm dhe në kundërshtim me procedurat parlamentare.
“Kryesuesi i seancës nuk ka mandat për të thirrur konsultime jashtë sallës plenare për çështje që lidhen me konstituimin. Në vend të kësaj, do të duhej të hidhej në votim sërish raporti i njëjtë nga komisioni përkatës dhe të vazhdohej me procesin,” theksoi ai.
Sipas tij, ndërprerja e seancës u bë në mënyrë arbitrare dhe pa dakordimin e përfaqësuesve të subjekteve politike në Kuvend, gjë që bie ndesh me parimet e funksionimit të një demokracie parlamentare.
- Advertisement -
Polemika për mandatet dhe dorëheqjet
Ndër çështjet kryesore që kanë shkaktuar ngërçin është kërkesa e opozitës që anëtarët e Qeverisë në detyrë të japin dorëheqje formale para se të marrin mandatin si deputetë.
Sipas Ligjit për Qeverinë, një ministër apo anëtar i ekzekutivit që zgjidhet deputet, duhet të japë dorëheqje nga posti ekzekutiv para certifikimit të rezultatit zgjedhor.
- Advertisement -
Por kryeministri në detyrë, Albin Kurti, ka deklaruar se kjo nuk është e nevojshme, pasi qeveria është në detyrë që prej muajit mars, kur u certifikuan rezultatet e zgjedhjeve të 9 shkurtit.
Vazhdimi i bllokadës dhe presioni për zgjedhje
Sipas Rregullores së Kuvendit, deputetët janë të obliguar të mblidhen çdo 48 orë derisa të arrihet konstituimi i legjislativit. Ndërkohë, opozita ka akuzuar Lëvizjen Vetëvendosje për zvarritje të qëllimshme të procesit, duke e lidhur situatën me pazare politike.
Konstituimi i Kuvendit do t’i hapte rrugë zgjedhjes së kryeparlamentarit dhe më pas formimit të qeverisë së re. Deri më tani, LVV nuk ka bërë publik emrin e kandidatit për kryetar të Kuvendit dhe as nuk ka konfirmuar nëse i ka votat e mjaftueshme për ta kaluar atë.
