Ata u shtirën si fqinj të përkushtuar dhe krijuan një marrëdhënie pothuajse familjare me çiftin gjerman në moshë të thyer. Por pas fasadës së sjelljes së mirë, fshihej një mashtrim i planifikuar me kujdes. Një 36-vjeçar dhe bashkëshortja e tij 25-vjeçe, të cilët dyshohet se janë nga Kosova, përvetësuan rreth 120 mijë euro nga një çift 86 dhe 82-vjeçar nga qyteti gjerman Lohmar.
Gjatë një gjykimi në distriktin e Siegburgut, u zbulua se skema mashtruese kishte nisur në maj të vitit 2023 dhe kishte vazhduar deri në shtator të po atij viti. I pandehuri kishte komunikuar përditë me të moshuarit, duke u paraqitur me histori të sajuara për sëmundje, vdekje në familje, probleme trashëgimie, madje edhe një rrëmbim të rremë në Kosovë.
Përmes një serie manipulimesh emocionale dhe gënjeshtrash, ata arritën të bindin çiftin e moshuar që t’u transferonin para, disa herë përmes llogarisë bankare dhe disa herë në dorë. Megjithëse një punonjës i vëmendshëm i bankës ngriti dyshime dhe njoftoi policinë, viktimat transferuan edhe 8 mijë euro të tjera pas ndërhyrjes së parë.
Pasi skema doli në dritë dhe të dy të pandehurit pranuan fajin, ata u shprehën të penduar dhe i kërkuan falje viktimave. Gruaja e moshuar, e cila ende nuk dëshironte t’i shihte si kriminelë, deklaroi në sallën e gjyqit: “E bëra sepse doja të ndihmoja dikë.”
- Advertisement -
Megjithatë, prokuroria i akuzoi për “energji të lartë kriminale” dhe shfrytëzim të paskrupullt të besimit të dy të moshuarve. Burri tani përballet me një dënim deri në dy vite burg, ndërsa bashkëshortja e tij me 21 muaj me kusht.
Zemërdhembshja e të moshuarve ishte një derë e hapur që u kthye në makth. Dhe ndërsa drejtësia po përpiqet të vendosë një ekuilibër, mbetet e paqartë nëse çifti do ta rimarrë ndonjëherë pasurinë e humbur.
