Kriza politike në Kosovë thellohet, pasi për të 12-tën herë me radhë ka dështuar konstituimi i Kuvendit, duke lënë vendin pa institucione funksionale tre muaj pas zgjedhjeve të 9 shkurtit.
Partia fituese, Lëvizja Vetëvendosje, nuk po arrin të sigurojë shumicën e nevojshme prej 61 votash për zgjedhjen e kryetarit të Kuvendit. Emri i propozuar nga kjo forcë politike, Albulena Haxhiu, është refuzuar nga partitë opozitare – PDK, LDK dhe AAK – të cilat gjithashtu kanë refuzuar bashkëpunimin me kryeministrin në detyrë, Albin Kurti.
Për këtë ngërç politik ka reaguar edhe Bashkimi Evropian. Komisionerja për Zgjerim e BE-së, Marta Kos, në një debat të zhvilluar në Parlamentin Evropian, theksoi se është në interes të Kosovës që sa më parë të formohen institucionet e reja.
“Është në interesin e Kosovës që t’i formojë sa më parë institucionet e saj për të çuar përpara reformat urgjente evropiane,” deklaroi Kos, duke shtuar se nënshkrimi dhe ratifikimi i marrëveshjeve që lidhen me Planin për Rritje duhet të jenë prioritet për qeverinë dhe kuvendin e ri. Ajo nënvizoi gjithashtu se plotësimi i këtyre kritereve do të hapte rrugën për lirimin e fondeve të BE-së për Kosovën.
- Advertisement -
Komisionerja përsëriti gjithashtu nevojën që Kosova të përmbushë pa vonesa obligimet e saj nga Marrëveshja e Ohrit, në kuadër të dialogut me Serbinë.
Sipas Kushtetutës së Kosovës, posti i kryetarit të Kuvendit i takon partisë fituese të zgjedhjeve, në këtë rast Vetëvendosjes. Ndërkohë, partitë e mëdha opozitare, përfaqësuesit e komunitetit serb dhe komuniteteve joshumicë, duhet të propozojnë nga një kandidat për postin e nënkryetarit. Zgjedhja e kryetarit dhe nënkryetarëve bëhet me shumicë votash dhe është kusht për përfundimin e seancës konstituive, që më pas hap rrugën për formimin e qeverisë së re.
Për momentin, mbetet e paqartë se si do të zhbllokohet situata, ndërsa përpjekjet për konstituim pritet të vazhdojnë në ditët në vijim.
