Policia e Kosovës ka arrestuar shoferin e dyshuar për shkaktimin e aksidentit tragjik që ndodhi të martën në fshatin Terstenik të Drenasit, ku humbi jetën një mërgimtar dhe u lëndua një person tjetër.
Sipas njoftimit zyrtar, i dyshuari është ndaluar dhe dërguar në mbajtje, ndërsa rasti është nën hetim nga organet kompetente.
Viktima është identifikuar si Aldion Mulaj, një mërgimtar i cili po qëndronte në Kosovë. Ai ishte duke udhëtuar me motoçikletë në momentin kur ndodhi përplasja me një veturë. Për fat të keq, Mulaj nuk arriti t’u mbijetojë plagëve, ndërsa miku i tij, që ndodhej me të në motoçikletë, ka pësuar lëndime trupore.
“Është raportuar për një aksident trafiku në mes të një veture dhe një motoçiklete. Përveç dëmeve materiale, drejtuesi i motorit – viktima, mashkull kosovar – ka ndërruar jetë, ndërsa pasagjeri ka pësuar lëndime trupore. Me urdhër të prokurorit, trupi i pajetë është dërguar për obduksion, ndërkohë që shoferi i veturës është arrestuar dhe dërguar në mbajtje”, thuhet në njoftimin e Policisë.
- Advertisement -
Hetimet për zbardhjen e plotë të rrethanave të aksidentit po vazhdojnë.
