Aksion proteste kundër çmimeve të larta të energjisë – Reagim ndaj kryetarit të ZRRE-së (VIDEO)

Aktivisti i shoqërisë civile, Dibran Hoxha, ka realizuar një aksion simbolik kundër paralajmërimit për shtrenjtimin e energjisë elektrike me 15%.

Në një video të publikuar në rrjetin social Facebook, Hoxha shihet duke i hedhur një tortë kryetarit të Bordit të Zyrës së Rregullatorit për Energji (ZRRE), Ymer Fejzullahut, ndërsa ai po hynte në veturën e tij, duke ia drejtuar mesazhin: “E ke dhuratë prej qytetarëve”.

“15% nuk kalon! Pas kërkesave të shumta nga qytetarët, vendosëm ta ‘embëlsojmë’ kryetarin e ZRRE-së me 15%. Zotni Ymerit i pëlqejnë tortat me pronarët e KEDS-it, ndaj sigurisht që duhet t’i pëlqejnë edhe tortat e qytetarëve. Urime!”, shkruan Hoxha në postimin e tij në Facebook.

Ndërkohë, më 5 prill është paralajmëruar një protestë qytetare kundër rritjes së çmimit të energjisë elektrike. Luan Hasanaj nga iniciativa “Asnjë cent më shumë” ka theksuar për RTK-në se protesta është e vetmja mundësi që qytetarët kanë për të kundërshtuar këtë vendim.

“Nëse rritet çmimi i rrymës, do të ketë një zinxhir shtrenjtimesh. Qytetarët vetëm duan mundësi të jetojnë normalisht në këtë vend. Rruga e vetme për të kërkuar llogari dhe përgjegjësi është protesta, sepse në fund të fundit, qytetarëve nuk u interesojnë aspektet teknike apo investimet në termocentrale – ata duan të mbijetojnë,” ka thënë Hasanaj.