Administrata e presidentit Donald Trump ka urdhëruar ambasadat amerikane të ndalojnë përkohësisht caktimin e takimeve për viza studentore dhe ato për shkëmbime kulturore, ndërsa përgatitet për masa më të ashpra sigurie ndaj aplikantëve të huaj.
Sipas një memoje të siguruar nga CBS News, Sekretari i Shtetit Marco Rubio njofton se pezullimi do të mbetet në fuqi “derisa të jepen udhëzime të reja”. Masa përfshin zgjerimin e kontrollit të profileve të aplikantëve në rrjetet sociale, një veprim që pritet të ndikojë ndjeshëm tek studentët ndërkombëtarë që synojnë të studiojnë në SHBA.
Ky vendim vjen në një kohë tensionesh të rritura mes administratës Trump dhe universiteteve elitare, të cilat presidenti i ka akuzuar për prirje të majta, antisemitizëm dhe diskriminim në proceset e pranimit. Në këtë kontekst, qeveria ka ndërmarrë hapa për të shkurtuar fondet për institucionet e arsimit të lartë dhe ka synuar dëbimin e studentëve të huaj nga vendi.
Universiteti i Harvardit ka qenë në qendër të sulmeve të Trump, por një gjykatës ka pezulluar përkohësisht një urdhër që do ta pengonte këtë institucion të pranonte studentë ndërkombëtarë.
