3 marsi shënon Ditën Botërore të Shkrimtarëve, e cila festohet çdo vit që prej vitit 1986. Kjo ditë u shpall nga Kongresi Ndërkombëtar i PEN Club, një shoqatë ndërkombëtare e shkrimtarëve e themeluar në Londër në vitin 1921, me qëllim promovimin e miqësisë dhe mbështetjes intelektuale ndërmjet shkrimtarëve nga e gjithë bota.
Emri “PEN” është një akronim i fjalëve angleze “Poets, Essayists, Novelists” (Poetë, Eseistë, Romanistë), por në të vërtetë përfshin shkrimtarë të të gjitha formave letrare, përfshirë gazetarët dhe historianët. Ideja për krijimin e kësaj organizate i takon shkrimtarit anglez C.A. Dawson Scott, ndërsa presidenti i parë ishte John Galsworthy. Sot, PEN Club International ka degë në mbi 130 vende.
Dita Botërore e Shkrimtarëve ka për qëllim të theksojë rolin e letërsisë në zhvillimin e kulturës botërore dhe të luftojë për lirinë e shprehjes. Kjo ditë festohet gjithashtu edhe më 23 prill, e njohur si Dita Botërore e Librit, e cila shënon lindjen ose vdekjen e shkrimtarëve të njohur si Miguel de Cervantes, William Shakespeare dhe Garcilaso de la Vega.
