Më 10 qershor 1999, sekretari i atëhershëm i përgjithshëm i NATO-s, Javier Solana, dha urdhrin për ndalimin e bombardimeve ndaj Serbisë, duke i dhënë fund fushatës ajrore që kishte nisur 78 ditë më parë. Po atë ditë, Këshilli i Sigurimit i Kombeve të Bashkuara miratoi Rezolutën 1244, e cila hapi rrugën për dislokimin e forcave paqeruajtëse ndërkombëtare në Kosovë.
Në kuadër të kësaj rezolute, mbi 37.000 trupa të KFOR-it nga 36 vende anëtare u vendosën në territorin e Kosovës, me qëllim ruajtjen e paqes dhe sigurisë.
Vetëm dy ditë më vonë, më 12 qershor 1999, trupat e para të këmbësorisë së NATO-s hynë në Kosovë, ndërsa paralelisht nisi tërheqja graduale e forcave serbe.
Misioni i NATO-s në Kosovë u organizua në pesë zona të përgjegjësisë, të cilat iu besuan kontingjenteve amerikane, britanike, franceze, gjermane dhe italiane.
- Advertisement -
Me praninë e NATO-s në vend, filloi gjithashtu edhe vendosja e Misionit të Përkohshëm të Kombeve të Bashkuara (UNMIK), i cili mori administrimin civil të Kosovës për një periudhë të përkohshme.
