Një ditë historike për kulturën dhe artin në vendin tonë. Sot, në Prishtinë, në një ceremoni të veçantë është prezantuar projekti fitues për Teatrin e Operës dhe Baletit të Kosovës.
Këtë ngjarje e hapi ministri i Kulturës, Hajrulla Çeku, i cili ndër të tjera në fjalën e tij tha që është i gëzuar që kjo ndërtesë, pas pothuajse pesë dekadave, do t’i dhuroj Prishtinës një ikonë të arkitekturës bashkëkohore, që do t’i qëndroj pranë një prej perlave të arkitekturës moderne, Pallatit të Rinisë dhe Sporteve.
Projekti fitues i teatrit do të projektohet nga arkitekti me famë botërore Biarke Ingels dhe studio e tij BIG, i cili sot ishte në Prishtinë dhe prezantoi këtë projekt para të pranishmëve.
Teatri përmban sallën koncertale me mbi 1200 ulëse, sallën teatrale me 1000 ulëse, dhomën koncertale dhe dhomën teatrale, të dyja me nga 300 ulëse. Ndërsa do të akomodojë parkingun nëntokësor me kapacitet me mbi 400 vendparkime pranë unazës së brendshme të Prishtinës, dhe do të jetë kalimi më i veçantë në mes të Pallatit të Rinisë dhe Sporteve dhe lagjes Arbëria.
- Advertisement -
Vlera e projektit për Teatrin e Operës dhe Baletit është 2 milionë e 450 mijë euro dhe do të përfundojë për 15 muaj, ndërsa zbatimi fillon në vitin 2026.
