Ekspozita vjetore e anëtarëve të Asociacionit të Artistëve Vizual të Kosovës ka bërë bashkë artistë të tre brezave, në edicionin e 4-të të mbajtjes.
Këto vepra artistike që fillojnë nga fryma realiste, ekspresive, surreale, abstrakte e deri tek trendet e artit konceptual, janë shpalosur përmes pikturës, skulpturës, dizajnit grafik, fotografisë artistike, grafikës, vizatimit etj.
Kamuran Goranci drejtor i AAVK-së, është shprehur se këtë vit për shkak se Galeria e Fakulteti të Arteve është në renovim, kjo ekspozitë është hapur në sallën e ekspozitave në Pallatin e Rinisë, duke falënderuar kështu Baki Jasharin- drejtorin e Filharmonisë së Kosovës për hapësirën, sepse aty i mbajnë provat.
Juria profesionale në përbërje nga: Hivzi Muharremi, Eshref Qahili dhe Faik Krasniqi kanë përzgjedhur 3 fituesit e kësaj ekspozitë, ku janë ndarë çmimet tradicionale në këtë edicion.
- Advertisement -
Tre fituesit e edicionit të 4-të të ekspozitës vjetore të Asociacionit të Artistëve Vizual të Kosovës janë piktori Erzen Vala, piktorja Marigona Ademi dhe skulptori Mal Myrtaj, të cilët janë shprehur se ndihen të nderuar me shpërblimet.
Në këtë ekspozitë prezantohet shumëllojshmëria e temave dhe imazheve që na sjellin artistët pjesëmarrës të gjeneratave të ndryshme, të cilët e plotësojnë mozaikun me momentet më aktuale të rrjedhave zhvillimore, të realizuara përmes imagjinatës së tyre gjithnjë në aplikim të teknikave të ndryshme të shpërfaqura në veprat artistike.
Asociacioni i Artistëve Vizual të Kosovës, organizon edhe Bienalen Ndërkombëtare të Vizatimit si dhe ekspozitën vjetore të anëtarëve, ndërsa ka për qëllim të prezantojë vlerat e mirëfillta artistike të tre brezave, para artdashësve në hapësirat vendore dhe ndërkombëtare.
