Në shenjë të ditëlindjes së babait, Sheremet Ali Kajtazit
(05.02.1949 – 20.09.2023)
BABAI
Nga frëngjitë e kullës së babait
përballë Bjeshkëve t’Nemuna
pashë hënën e ndritshme mbi gardh
dhe lulet e verdha që kishin çelë n’shtator!
Për çudi, atë pasdite, dritë s’pashë
fort kish errë zi
aq zi, sa dielli u bë hi
e shikimet u bënë të ftohta, pa kthim!
- Advertisement -
E di, pas gjithçkaje jam thyer, braktisur
e kam tuten se mund t’humbas n’harresë
mandej, nata kur vjen e ftohtë
do t’hidhem n’përqafim si erë!
Gjithsesi, rrjedhat e rrugës kanë shumë mall
baba, një ditë bashkë larg do t’shkojmë
e në emër të së mirës
si rrënjët nën tokë do t’udhëtojmë!
