Përmes një njoftimi për media nga Forca e Sigurisë së Kosovës bëhet e ditur se Komandanti i FSK-së gjenerallejtënant Bashkim Jashari, ka pritur sot në takim Komandantin e ri të Gardës Kombëtare të Iowa-s, gjeneral brigade Stephen Osborn, i cili po qëndron për herë të parë në vizitë në Kosovë në cilësinë e Komandantit të GK Iowa.
Fillimisht, komandanti i FSK-së, i ka uruar mirëseardhje gjeneralit Osborn dhe e ka njoftuar me të arriturat e FSK-së, planin e zhvillimit dhe tranzicionit dhe përgatitjet që janë bërë deri në këtë fazë për të realizuar ushtrimin ndërkombëtar “Defender Europe 23”.
Në njoftim thuhet se gjeneral Jashari falënderoi gjenerali Osborn, për bashkëpunimin e shkëlqyer dhe mbështetjen e vazhdueshme që Garda Kombëtare e Iowa’s ka dhënë në ngritjen e kapaciteteve të FSK-së në fushën e korit të nënoficerëve, mjekësisë ushtarake, fushën e sigurisë kibernetike dhe së fundi me fokus të shtuar në fushën e manovrës luftarake.
Gjatë takimit gjeneralët biseduan edhe për misionin e përbashkët (SHBA, Kosovë) në Kuvajt në vitin 2020, ku gjeneral Jashari theksoi se FSK është e gatshme për pjesëmarrje në zbarkimet e ardhshme të gardës si dhe të ushtrisë amerikane.
- Advertisement -
Gjatë vizitës Komandanti i Gardës Kombëtare të Iowa-s gjenerali Osborn ka vizituar edhe Shtabin e Përgjithshëm të FSK-së ku është njoftuar me të arriturat, planet dhe operacionet që është duke realizuar FSK. Gjeneralët u zotuan për të vazhduar partneritetin e shkëlqyer në mes dy ushtrive në ngritjen dhe avancimin e bashkëpunimit dhe partneritetit.
